جنوبی افریقی کپتان کوئنٹن ڈی کاک نے میچ سے قبل کہا کہ پہلا میچ منسوخ ہونے سے کافی مایوس ہوں لیکن دوسرے میچ میں پوری تیاری کے ساتھ اتریں گے۔
انہوں نے کہا کہ پہلا میچ نا ہونے کی وجہ سے ہم کافی مایوس ہیں لیکن ہم آئندہ برس ہونے والے ٹی 20عالمی کپ سے قبل زیادہ سے زیادہ ٹی 20 میچ کھیلنا چاہتے ہیں تا کہ عالمی کے لیے بھرپور اور اچھی تیاری ہو سکے اور ایسے میں اگر ایک بھی میچ منسوخ ہوگا تو یہ کافی مایوس کن ہے۔
ڈی کاک نے کہا کہ پہلا میچ منسوخ ہونے سے اب یہ دو میچوں کی سیریز ہوگئی ہے اور اس سنسنی خیز فارمیٹ میں ان کی ٹیم ہر حال میں جیت درج کرنا چاہےگی۔
جنوبی افریقی کپتان نے کہا کہ عالمی ٹیسٹ چیمپیئن شپ میں ابھی کافی وقت ہے اور ٹیم کی پوری توجہ فی الحال ٹی 20 عالمی کپ کی تیاری پر مرکوز ہے اور ہم اسی فارمیٹ میں اچھی کارکردگی کا مظاہرہ کرنے کے بارے میں سوچ رہے ہیں۔
اسی کے ساتھ ڈی کاک نے بھارتی کپتان وراٹ کوہلی اور اپنے تیز گیند باز ربادا کے تعلق سے کہا کہ ٹی 20 سیریز کے بقیہ دونوں میچ ان دونوں کھلاڑیوں کے درمیان سنسنی خیز ٹکر دیکھنے کا اہم موقع دےگی۔
انہوں نے کہا بلے بازی میں وراٹ کوہلی کمال کی مہارت رکھتے ہیں جبکہ گیند بازی میں ربادا کا بھی جواب نہیں، یہ دونوں ہی بہترین کھلاڑی ہیں، وراٹ اور ربادا کے درمیان دلچسپ مقابلہ ہونے کی امید ہے، دونوں کےکھیلنے کا طریقہ کافی جارحانہ ہے،کرکٹ مداحوں کےلیے ان کے درمیان ٹکر دیکھنے کا اچھا موقع ہوگا۔
اس کے علاوہ ڈی کاک نے انڈین پریمئر لیگ کی بھی ستائش کی، رواں برس آئی پی ایل کی فاتح ٹیم ممبئی انڈینس کاحصہ رہے ڈی کاک نے کہا کہ آئی پی ایل کا خطاب میرے کریئر کی بڑی کامیابیوں میں سے ایک ہے، میں نے اب تک عالمی کپ نہیں جیتا ہے اس لیے آئی پی ایل کی ٹرافی ہی میرے لیے فی الحال سب سے اہم ہے۔
