اچھے آغاز کے بعد پٹری سے اتری کولکاتا نائٹ رائیڈرس آج اپنے گھریلو میدان ایڈن گارڈن پر بہترین فارم میں چل رہی ممبئی انڈیئنز کا سامنا کرے گی۔
ممبئی اس میچ میں پلے آف میں جگہ پکی کرنے کا مقصد لے کر اترے گی جبکہ کولکاتا نائٹ رائیڈرس کے سامنے خود کو اس دوڑ میں شامل کرنے کا چیلنج ہوگا۔
میچ سے قبل اس سیزن کے 10 میچوں میں اب تک 406 رنز بنا چکے کولکاتا نائٹ رائڈرس کے طوفانی بلے باز آندرے رسل نے کہا کہ ہم غلط فیصلے لے رہے ہیں، اگر ہم انہیں آگے بھی دہراتے رہے تو ہم ہمیشہ ہارتے رہیں گے۔
انہوں نے کہا کہ 'میں کچھ ایسے میچوں کے بارے میں بتا سکتا ہوں جس میں ہمیں صرف صحیح لائن اور لینتھ میں گیندبازی کرنے کی ضرورت تھی اور ایسا کر کے ہم میچ کو اپنے قبضے میں کر سکتے تھے لیکن اس وقت فیصلے کی وجہ سے ایسا نہیں ہو سکا۔
واضح رہے کہ کولکاتا اس وقت 11 میچوں میں آٹھ پوائنٹس کے ساتھ پوائنٹس ٹیبل میں چھٹے نمبر پر ہے۔
کولکاتا کو بدترین فیلڈنگ والی ٹیم بتاتے ہوئے رسل نے کہا ہے کہ اصل میں بلے بازی ٹیم کا مسئلہ نہیں ہے ہم نے کچھ ایسے اسکور بنائے تھے جس کا ہمیں دفاع کرنا چاہئے تھا لیکن ہم خراب فیلڈنگ کی وجہ سے میچ گںوا بیٹھے۔
رسل نے اس سے پہلے چار نمبر پر بلے بازی کرنے کی خواہش ظاہر کی تھی، انہوں نے کہا میری کوچ کے ساتھ بات چیت ہوئی ہے جب بھی ٹیم کو میری ضرورت ہوتی ہے تو وہ میری مدد کرتے ہیں اگر مجھے نمبر تین یا چار پر بلے بازی کرنے کی ضرورت ہوگی تو یہ میرا کام ہو گا کہ میں اچھی بلے بازی کروں۔
