ورلڈ کپ فاتح کپتان ایون مورگن اور ٹیسٹ ٹیم کے کپتان جو روٹ کے علاوہ انگلینڈ اینڈ ویلز کرکٹ بورڈ (ای سی بی) نے 55 کھلاڑیوں کو بیرونی پریکٹس شروع کرنے کی ہدایت دی ہے۔
كووڈ۔19 وبا کی وجہ سے دنیا بھر میں کرکٹ سرگرمیاں ٹھپ ہیں، لیکن ای سی بی ناظرین کے بغیر کرکٹ شروع کرنے کا سانچہ تیار کر رہا ہے۔گزشتہ ہفتے انگلینڈ کے 18 فاسٹ بولر انفرادی ٹریننگ شروع کر چکے ہیں اور ای سی بی نے ٹیسٹ کرکٹ کو ذہن میں رکھتے ہوئے اس لسٹ میں 37 اور کھلاڑیوں کے نام شامل کئے ہیں۔
اس لسٹ میں جیمز اینڈرسن اور جوفرا آرچر کی تیز گیند بازوں کی جوڑی کا نام ہے، لیکن ایلیکس ہیلز، لیام پلنکٹ اور جو کلارک کو اس میں جگہ نہیں ملی ہے۔
ای سی بی نے تصدیق کی کہ کھلاڑیوں کو پریکٹس شروع کرنے کو کہا گیا ہے۔برطانوی حکومت کی منظوری ملنے کے بعد مردوں کی ٹیم کو ناظرین کے بغیر کھیلنے کی امید ہے۔
پریکٹس کرنے والے کھلاڑیوں کی فہرست میں معین علی، جانی بيرسٹو، اسٹیورٹ براڈ، جوز بٹلر، عادل راشد، ٹام کرن، ڈیوڈ ولی اور سیم بلنگس کا بھی نام ہے۔ای سی بی نے کہا کہ فارمیٹ کے مطابق کھلاڑیوں کا سلیكشن صحیح وقت پر کیا جائے گا۔ای سی بی کے پرفامنس ڈائریکٹر مو بوباٹ نے کہاکہ ہم اس موسم میں انٹرنیشنل کرکٹ کھیلنے کے اپنے ہدف کے قریب جا رہے ہیں۔ کھلاڑیوں کا پول سلیکٹرز کو مضبوط اختیارات دے گا۔جو مختلف فارمیٹ کی ٹیم کا انتخاب کریں گے۔
بورڈ نے کہا کہ وہ اپنے کاؤنٹی ٹیموں کے ساتھ مل کر کام کر رہا ہے جس سے کھلاڑیوں کو پریکٹس کرنے کے لئے محفوظ ماحول مل سکے۔
اس درمیان سرے کاؤنٹی انتظامیہ نے کورونا احتیاطی تدابیر کے حوالے سے منصوبہ بندی شروع کرتے ہوئے 25 ہزار 500 تماشائیوں والے اوول گراؤنڈ میں 6 ہزار تماشائیوں کے میچ دیکھنے کے پلان کی تیار ی شروع کردی ہے۔
انگلینڈ کے اوول گراونڈ میں 25 ہزار 500 تماشائیوں کے بیٹھنے کی گنجائش ہےتاہم کورونا وباء کے تناظر میں سرے کاونٹی کا کہنا ہے کہ سماجی فاصلے کے اصولوں کو اپناتے ہوئے کرکٹ کی سرگرمیاں شروع ہو ئیں تو تماشائیوں کی تعداد کو کم رکھا جا سکتا ہے۔
واضح رہے کہ اوول گراؤنڈ نے شیڈول کے مطابق ویسٹ انڈیز کے خلاف پہلے ٹیسٹ کی میزبانی کرنا تھی ۔میڈیا رپورٹس کے مطابق ویسٹ انڈیز انگلینڈ سیریز جون کی بجائے اب جولائی میں شیڈول کی جا رہی ہے۔
دوسری جانب اسپورٹس ماہرین کا کہناہے کہ موجودہ حالات دیکھتے ہوئے رواں سیزن میں اوول میں انٹر نیشنل میچوں کا انعقاد ممکن دکھائی نہیں دے رہا ہے۔
