بھارتی ٹیم نے ویسٹ انڈیز کو جیت کے لیے 419 رنز کا ہدف دیا تھا لیکن میزبان ٹیم اسے حاصل کرنے میں ناکام ثابت ہوئی اور پوری ٹیم 100 رنز پر آؤٹ ہوگئی۔
ویسٹ انڈیز کے 9 کھلاڑی محض 50 رنز پر پویلین لوٹ گئے تھے جبکہ نویں نمبر پر بلے بازی کرنے آئے تیز گیندباز کیمر روچ اور گیارہویں نمبر کے بلے باز میگوئیل کمنز نے آخری وکٹ کے لیے 50 رنز کی پارٹنرشپ کی لیکن اس پارٹنرشپ نے محض شکست کا فرق کم کیا۔
ویسٹ انڈیز کی جانب سے کیمر روچ نے سب سے زیادہ 38 رنز بنائے جبکہ آخری نمبر کے بلے باز کمنز نے 19 اور روسٹن چیز نے 12 رنز بنائے اس کے علاوہ کوئی بھی بلے باز دوہرے ہندسے تک نہیں پہنچ سکا۔
بھارتی گیندبازوں نے کیریبیئن بلے بازوں کو کھل کر کھیلنے کا موقع نہیں دیا اور تیز گیندباز جسپریت بمراہ نے پانچ بلے بازوں کو پویلین کی راہ دکھائی جبکہ پہلی اننگ میں بہترین گیندبازی کرنے والے ایشانت شرما نے دوسری اننگ میں بھی تین وکٹیں حاصل کیں جبکہ محمد سمیع نے دو بلے بازوں کو آؤٹ کیا۔
اس سے قبل بھارت نے اپنی دوسری اننگ میں اجنکیا رہانے اور ہنوما وہاری کی شاندرار بلے بازی کی بدولت 7 وکٹوں کے نقصان پر 343 رنز پر اپنی اننگ ڈکلیئر کر دی تھی۔
بھارت کے نائب کپتان اجنکیا رہانے نے پہلی اننگ کی طرح دوسری اننگ میں بھی بہترین بلےبازی کی، انہوں نے پہلی اننگ میں 81 رنز بنائے تھے جبکہ دوسری اننگ میں سنچری مکمل کی اور 102 رنز بنائے، جبکہ ہنوما وہاری اپنی سنچری بنانے سے چوک گئے اور 93 رنز پر ویسٹ انڈیز کپتان جیسن ہولڈر کا شکار بنے۔
رہانے اور وہاری کے مابین 135 رنز کی پارٹنرشپ ہوئی، ان دونوں کے علاوہ کپتان وراٹ کوہلی نے بھی 51 رنز کی اننگ کھیلی تھی۔
اس جیت کے ساتھ بھارت نے تین میچوں کی سیریز میں 0-1 کی برتری حاصل کرلی ہے جبکہ اسی کے ساتھ آئی سی سی ٹیسٹ چیمپیئن شپ میں فاتحانہ آغاز کیا ہے۔
