بھارت کے مختصر فارمیٹ نائب کپتان روہت شرما ون ڈے کرکٹ میں نو ہزاری بننے کی دہلیز پر پہنچ گئے ہیں اور آسٹریلیا کے خلاف منگل سے شروع ہونے والی تین میچوں کی سیریز میں یہ کامیابی حاصل کر سکتے ہیں۔
ہٹ مین نام سے مشہور روہت نے اپنے ون ڈے کیریئر میں 221 میچوں میں 49.14 کی اوسط سے 8944 رن بنائے ہیں اور انہیں نو ہزاری بننے کے لیے محض 56 رن کی ضرورت ہے۔
اپنے کیریئر میں 28 ون ڈے سنچری بنا چکے روہت نے گزشتہ سال انگلینڈ میں ہوئے ون ڈے ورلڈ کپ میں پانچ سنچری بنانے کا عالمی ریکارڈ قائم کیا تھا۔
روہت اگر یہ کامیابی حاصل کرتے ہیں تو ون ڈے کرکٹ میں نو ہزاری بننے والے وہ دنیا کے 20 ویں بلے باز ہوں گے۔
بھارت میں ان سے آگے محمد اظہرالدین (9378)، مہندر سنگھ دھونی (10،773)، راہل دراوڑ (10،889)، سوربھ گانگولی (11،363)، وراٹ کوہلی (11،609) اور سچن تندولکر (18،426) ہیں۔اس سیریز میں آسٹریلیا کے ڈیوڈ وارنر 5000 رن بنانے کی کامیابی حاصل کر سکتے ہیں۔
انہیں ون ڈے میں پانچ ہزاری بننے کے لیے صرف 10 رنز کی ضرورت ہے۔ وہ اس معاملے میں سب سے تیز آسٹریلوی بلے باز بن جائیں گے۔ ڈین جونز نے جہاں پانچ ہزار رن بنانے کے لیے 128 اننگزکھیلی تھیں وہیں وارنر نے اب تک 114 اننگز کھیلی ہیں۔
بھارت کے چائنامین بولر کلدیپ یادو کو ونڈے میں وکٹوں کی سنچری مکمل کرنے کیلئے صرف ایک وکٹ کی ضرورت ہے۔ کلدیپ کے 56 میچوں سے 99 وکٹ ہیں۔ یہ کامیابی حاصل کرنے والے وہ بھارت کے 22 ویں بولر بن جائیں گے۔
آسٹریلیا کے فاسٹ بولر پیٹ کمنز کو ون ڈے میں وکٹوں کی سنچری مکمل کرنے کیلئے چار وکٹ کی ضرورت ہے۔
