بھارتی کرکٹ ٹیم کے سابق کپتان مہندر سنگھ دھونی کے ریٹائرمنٹ کی قیاس آرائیوں کے درمیان ٹیم انڈیا کے ہیڈ کوچ روی شاستری نے کہا ہے کہ دھونی ون ڈے کرکٹ سے جلد ریٹائرمنٹ کااعلان کر سکتے ہیں۔
روی شاستری نے نیوز -18 انڈیا سے بات چیت میں اشارہ دیا ہے کہ دھونی جلد ہی اپنے ون ڈے کیریئر کو الوداع کہہ سکتے ہیں۔ اگرچہ وہ اس کے بعد بھی ٹی -20 کرکٹ کھیلنا جاری رکھ سکتے ہیں۔
دھونی ٹیسٹ کرکٹ سے پہلے ہی ریٹائرمنٹ لے چکے ہیں۔ شاستری کی اس بات پر اگر یقین کیا جائے تو دھونی آسٹریلیا میں اسی سال ہونے والے ٹی -20 ورلڈ کپ میں بھی کھیلتے نظر آ سکتے ہیں۔
شاستری کے اس بیان پر سمجھا جا سکتا ہے کہ دھونی اس سال اکتوبر میں آسٹریلیا میں ہونے والے ٹی -20 ورلڈ کپ میں بھارتی ٹیم کا حصہ بن سکتے ہیں۔
دھونی نے جولائی 2019 میں ون ڈے ورلڈ کپ کے سیمی فائنل کے بعد سے بین الاقوامی کرکٹ نہیں کھیلا ہے، لیکن انہوں نے ریٹائرمنٹ کو لے کر راست طور پر کوئی بات نہیں کی ہے۔
واضح رہے کہ سابق بھارتی کوچ انل کمبلے نے بھی حال میں کہا تھا کہ آئی پی ایل -2020 دھونی کے آگے کھیلنے کی سمت طے کرے گا۔ اب شاستری بھی مانتے ہیں کہ آئی پی ایل دھونی کے لیے خاصا اہم ہو گا۔
اگرچہ چیف سلیکٹر ایم ایس كے پرساد بار بار کہہ چکے ہیں کہ ٹیم انڈیا ابھی دھونی سے آگے کی جانب دیکھ رہی ہے اور اس کا پورا دھیان رشبھ پنت پر لگا ہوا ہے جنہیں دھونی کا متبادل مانا جا رہا ہے۔
بھارتی کو سری لنکا کے خلاف موجودہ ٹی -20 سیریز کے بعد آسٹریلیا سے تین میچوں کی گھریلو ون ڈے سریز کھیلنی ہے۔ 38 سال کے دھونی ان دونوں ہی ٹیموں کا حصہ نہیں ہیں ۔
بھارت کو آسٹریلیا سے کھیلنے کے بعد نیوزی لینڈ کے دورے پر جانا ہے۔ یہ دیکھنا دلچسپ ہوگا کہ دھونی کیوی دورے میں ٹیم انڈیا میں جگہ بنا پاتے ہیں یا نہیں۔دھونی نے 90 ٹیسٹ میچوں میں 38.09 کی اوسط سے 4876 رنز، 350 ون ڈے میں 50.57 کے اوسط سے 10773 رنز اور 98 ٹی -20 میچوں میں 37.60 کی اوسط سے 1617 رن بنائے ہیں۔
انہوں نے ٹیسٹ میں 256 کیچ اور 38 اسٹمپنگ ، ون ڈے میں 321 کیچ اور 123 اسٹمپنگ اور ٹی -20 میں 57 کیچ اور 34 اسٹمپنگ کی ہیں۔
