انل کمبلے ایک بار پھر سے بھارتی کرکٹ ٹیم سے وابستہ ہو سکتے ہیں کیونکہ سورو گنگولی کی زیرقیادت بی سی سی آئی انہیں ٹی 20 ورلڈ کپ کے بعد روی شاستری کی بطور ہیڈ کوچ میعاد مکمل ہونے پر وی وی ایس لکشمن کے ساتھ قومی کرکٹ ٹیم کے ہیڈ کوچ کے عہدے کے لیے درخواست دینے کے لیے کہہ سکتا ہے۔
بھارتی کرکٹ ٹیم کے سابق اسپنر کمبلے 2016-17 کے درمیان ایک برس تک بھارتی ٹیم کے کوچ رہ چکے ہیں جب سچن تندولکر، لکشمن اور گنگولی کی سربراہی والی کرکٹ ایڈوائزری کمیٹی نے انہیں روی شاستری کی جگہ مقرر کیا تھا۔
کپتان وراٹ کوہلی کے ساتھ تلخ جھگڑے کی وجہ سے کمبلے نے چیمپئنز ٹرافی فائنل میں پاکستان کے خلاف شکست کے بعد استعفیٰ دے دیا تھا۔
اس کے علاوہ انل کمبلے کے ساتھ بی سی سی آئی، سابق بلے باز وی وی ایس لکشمن سے بھی رابطہ کرسکتا ہے جو گزشتہ چند برسوں سے آئی پی ایل فرنچائزی سن رائزرس حیدرآباد کے مینٹر ہیں۔ تاہم کمبلے پسندیدہ ہوں گے لیکن لکشمن کو بھی نظر انداز نہیں کیا جا سکتا۔
بی سی سی آئی براس کے لیے ایک معروف بھارتی کوچ ہمیشہ پہلی پسند ہوتا ہے۔ کمبلے اور لکشمن دونوں ہی بھارت کے بہترین اور عظیم کرکٹر میں شمار ہوتے ہیں نیز ان دونوں کے پاس 100 سے زائد ٹیسٹ میچ کھیلنے کے ساتھ ساتھ کوچنگ کا بھی تجربہ ہے جو بی سی سی آئی کے پیمانے میں بالکل فٹ ہوتا ہے۔
ذرائع نے کہا بتایا کہ بھارتی ٹیم کے کوچ کے لیے درخواست دینے کے لیے امیدوار کا بطور کرکٹر اچھے ریکارڈ کے ساتھ ساتھ کوچنگ یا مینٹرشپ کا تجربہ ہونا ضروری ہے۔
اس کے علاوہ جب بی سی سی آئی عہدیدار سے پوچھا گیا کہ کیا وکرم راٹھوڑ بھی ہیڈ کوچ کی دوڑ میں ہیں؟ تو انہوں نے کہا کہ 'وکرم راٹھوڑ بھی درخواست دے سکتے ہیں لیکن ہیڈ کوچ بننے کے لیے جو پیمانے ہیں وہ وکرم راٹھوڑ کے پاس نہیں ہیں۔ وہ بہترین اسسٹنٹ کوچ ہیں تاہم جب نئے کوچ کا انتخاب ہوگا تو ان اس کے پاس خود ایک ٹیم ہوگی۔
