ہالی ووڈ کے مشہور جوڑے ٹام ہینکس اور ریٹا ولسن جو حال ہی میں کورونا وائرس سے صحت یاب ہوئے ہیں، نے کووڈ-19 کے خلاف جنگ میں مدد دینے کا فیصلہ کیا ہے۔
ہینکس نے این پی آر پر انکشاف کیا 'ہم دونوں میاں بیوی کووڈ-19 تحقیق کے لیے خون اور پلازمہ کا عطیہ دیں گے'۔
انہوں نے کہا 'بہت سارے سوالات ہیں؟ جسیے اب ہم کیا کریں؟ کیا ہم کچھ کر سکتے ہیں؟ اور حقیقت میں، ہمیں ابھی پتہ چلا ہے کہ ہمارے اندر کووڈ-19 سے لڑنے کے لیے اینٹی باڈیز موجود ہیں'۔
انہوں نے کہا 'ہمیں ابھی تک کسی نے عطیہ دینے کو نہیں کہا ہے، اگر ہم سے خون و پلازمہ کا عطیہ چاہیے تو ہم دینے کے لیے تیار ہیں'۔
ٹام ہینکس اور ریٹا ولسن ہالی وڈ کی پہلی شخصیات ہیں جو کووڈ-19 سے متاثر ہوئے تھے۔
11 مارچ کو انہوں نے انکشاف کیا تھا کہ ہم دونوں میاں بیوی کو کورونا وائرس ہو گیا ہے، اور اس کے بعد دونوں اپنے گھر میں ہوم قرنطینہ میں تھے اور مارچ کے آخر میں انہوں نے بتایا کہ اب ہم صحتیاب ہو چکے ہیں۔
ٹام ہینکس اور ریٹا ولسن کووڈ-19 کا شکار آسٹریلیا میں ہوئے تھے، آسٹریلیا میں وہ دونوں ایک فلم پر کام کر رہے تھے۔
