بالی وڈ کے شہنشاہ امیتابھ بچن نے صدر رام ناتھ كووند سے راج بھون میں دادا صاحب پھالکے ایوارڈ حاصل کیا۔
میگا اسٹار کو فلمی دنیا میں ان کی گراں قدر خدمات کے عوض فلم انڈسٹری کے اعلی ترین اعزاز سے نوازا گیا۔
اس ایوارڈ کا نام بھارتی سنیما کے بانی، دھنڈی راج گووند پھالکے کے نام پر رکھا گیا ہے اور اس کی شروعات سنہ 1969 میں ہوئی تھی۔
یہ ایوارڈ مرکزی حکومت کی جانب سے بھارتی فلم انڈسٹری میں بہتر کارکردگی کے بدلے میں دیا جاتا ہے، اس ایوارڈ میں طلائی کمل، شال اور 10 لاکھ روپے کا نقد انعام شامل ہے۔
واضح رہے کہ بالی وڈ کے شہنشاہ امیتابھ بچن کو اگنی پتھ، بلیک، پا اور پیكو فلم کے لیے چار مرتبہ نیشنل ایوارڈز سے نوازا جا چکا ہے، انہوں نے سنہ 1969 میں 'سات ہندوستانی' سے اپنے فلمی کریئر کی شروعات کی تھی۔
امیتابھ بچن کو سنہ 2015 میں پدم وبھوشن سے نوازا گیا تھا جو کہ ملک کا دوسرا سب سے بڑا شہری اعزاز ہے۔
سنہ 2018 کا دادا صاحب پھالکے ایوارڈ فلمی دنیا میں نمایاں خدمات انجام دینے کے لیے ہندی فلمی دنیا کے عظیم اداکار امیتابھ بچن (77 برس) کو دیا جانا تھا لیکن بچن طبیعت ناساز ہونے کی وجہ سے شرکت نہیں کر سکے تھے۔
سنہ 2017 میں یہ ایوارڈ آنجہانی اداکار ونود کھنہ کو دیا گیا تھا۔
