سشانت سنگھ راجپوت 21 جنوری 1986 کو بہار کے دارالحکومت پٹنہ میں پیدا ہوئے تھے۔ انہوں نے ابتدائی تعلیم پٹنہ کے سینٹ کیرنس ہائی اسکول سے جبکہ دہلی کے کولاچی ہنسراج ماڈل اسکول سے ہائی اسکول کی تعلیم مکمل کی اور دہلی کالج آف انجینئرنگ سے مکینیکل انجینئرنگ کی ڈگری حاصل کی۔
سشانت سنگھ فلمی دنیا میں کریئر بنانا چاہتے تھے اور اپنے اسی خواب کو سچ کرنے کے لیے وہ مایا نگری ممبئی چلے آئے۔
ممبئی آنے کے بعد سشانت نے بیک گراؤنڈ ڈانسر کی حیثیت سے اپنے کیریئر کا آغاز کیا۔ وہ فلم فیئر ایوارڈ تقریب میں متعدد بار ڈانس بھی کرتے نظر آئے۔ اس شو کے دوران ہی بالاجی ٹیلی فلمز کی کاسٹنگ ٹیم کی نظر سشانت پر پڑی جس کے بعد ان کے کریئر کا آغاز 'کس دیش میں ہے میرا دل' نامی سیریل سے ہوا۔ اس میں انہوں نے پریت جُنیجا کا کردار ادا کیا۔
اس کے بعد ذی ٹی وی 'پوِترا رشتہ' نامی شو میں سشانت سنگھ کام کیا جو ان کے کریئر کے لیے سنگ میل ثابت ہوا اور سشانت کا چھوٹے پردے شناخت ملی۔
بعد ازاں وہ ڈانس رئیلٹی شو 'ذرا نچ کے دِکھا سیزن 2' اور 'جھلک دِکھلا جا سیز 4' میں بھی نظر آئے۔ کم وقت میں ہی ٹیلی ویژن کا ایک بڑا اسٹار بننے والے سشانت نے فلموں کی جانب رُخ کیا۔
سُشانت سنگھ راجپوت نے سنہ 2013 میں ابھیشیک کپور کی ہدایت کاری میں بنی فلم 'کائی پو چے' سے بالی وڈ میں قدم رکھا۔
فلم 'کائی پو چے' میں ان کے کردار کی تحریک انہیں اپنی بہن میتو سنگھ سے ملی تھی جو ریاستی سطح کی کرکٹر ہیں۔ اس فلم میں سُشانت کی اداکاری کو شائقین نے خوب پسند کیا۔
اسی برس 'یش راج' بینر کے تحت بنی فلم 'شُدھ دیسی رومانس' میں بھی سُشانت سنگھ نے اپنی رومانوی اداکاری سے ناظرین کا دل جیت لیا۔
اس کے بعد سنہ 2014 میں راجکمار ہیرانی کی ہدایتکاری میں بنی بلاک بسٹر فلم 'پی کے' یوں تو مکمل طور پر عامر خان کی اداکاری پر منبی تھی لیکن اس میں سُشانت سنگھ راجپوت کی اداکاری نے ناظرین کو کافی محظوظ کیا تھا۔
انہوں نے سنہ 2015 میں ریلیز ہوئی دیباکر بنرجی کی ہدایتکاری میں بنی فلم 'بیومکیش بخشی' میں اپنی مضبوط اداکاری سے ایک بار پھر سے فلمی ناظرین کا دل جیت لیاتھا۔
سال 2016 میں ریلیز ہوئی فلم 'ایم ایس دھونی: دی اَن ٹولڈ اسٹوری' سُشانت سنگھ کے کریئر کی سب سے بڑی ہٹ فلم مانی جاتی ہے۔ اس فلم میں انہوں نے بھارتی کرکٹ ٹیم کے سابق کپتان مہندر سنگھ دھونی کا کردار ادا کیا تھا جسے کافی پزیرائی ملی تھی۔
سُشانت نے اسکرین پر دھونی بننے کے لیے سخت محنت کی تھی۔ ماہی کی چال سے لے کر بال تک۔ تلفظ سے لے کر بیٹنگ کے انداز تک، سب کچھ ہوبہو نقل کرنے کی بہترین کوشش کی تھی۔
اس کے بعد انہوں نے رابطہ، کیدار ناتھ، سون چریا اور چھِچھورے جیسی فلموں میں بھی کام کیا۔
انہوں نے آر مادھون کے ساتھ ایک سائنس فکشن خلائی فلم چندا ماما دور کے میں شامل ہونا تھا لیکن کسی وجہ سے اس فلم کی شوٹنگ نہیں ہوسکی اس کے علاوہ انہوں نے 'اسٹوریز آف انڈیا' کے موضوع پر ایک بائیوپک سیریز میں سیاسی حکمت عملی کے ماہر چانکیہ، شاعر رابندر ناتھ ٹیگور اور سابق صدر جمہوریہ اے پی جے عبدالکلام سمیت 12 اہم شخصیات کے کرداروں نبھانا تھا۔
لیکن 14 جون خبر آئی کہ سشانت سنگھ راجپوت ممبئی کے باندرہ میں واقع اپنے مکان میں مردہ حالت میں ملے۔ اس دل سوز خبر نے سُشانت کے تمام مداحوں کو سکتے ڈال دیا۔
سشانت سنگھ راجپوت نے مشہور ایکشن ڈائریکٹر ایلن امین سے مارشل آرٹس کی ٹریننگ بھی لی تھی۔
سُشانت سنگھ راجپوت اپنی 'لو لائف' کے سلسلے میں بھی اخبارات اور ٹی وی میں سرخیوں میں رہے۔ وہ طویل عرصے سے اپنی گرل فرینڈ انکیتا لوکھنڈے کے ساتھ تعلقات میں تھے۔ دونوں کی ملاقات پہلی بار 'پوِتر رشتہ' کے سیٹ پر ہوئی تھی اور وہیں سے ہی ان کی محبت شروع ہوئی۔
