سلمان کے شائقین عید پر اپنے سپر اسٹار کی فلم سے محروم

بالی وڈ کے دبنگ اسٹار سلمان خان ہر برس عید کے موقع پر اپنے مداحوں کو فلموں کے ذریعے عیدی دیا کرتے تھے لیکن اس مرتبہ عید کے موقع پر شائقین سنیما گھروں میں ان کی فلم سے محروم رہے۔

کورونا وائرس کے قہر نے پوری دنیا کو بدل دیا ہے، تقریباً دو ماہ سے زائد عرصہ سے سبھی سنیما گھر بند ہیں، سنہ 2010 سے سلمان خان کے پرستار اپنے بھائی جان کی فلمیں دیکھ کر عید مناتے آرہے ہیں لیکن اس برس یہ ممکن نہیں ہوسکا، سنہ 2010 سے سلمان کی فلمیں عید کے موقع رلیز ہوا کرتی تھیں، صرف 2013 میں ایک مرتبہ ایسا ہوا تھا جب وہ ناظرین کو عید کا تحفہ نہیں دے پائے تھے۔

سنہ 2010 میں دبنگ، 2011 میں باڈی گارڈ، 2012 میں ایک تھا ٹائیگر، 2014 میں کک، 2015 میں بجرنگی بھائی جان، 2016 میں سلطان، 2017 میں ٹیوب لائٹ، 2018 میں ریس، 2019 میں بھارت جیسی فلمیں ریلیز ہوئی تھیں۔

اور رواں برس سلمان کی فلم ’رادھے‘ عید پر ریلیز ہونے والی تھی لیکن یہ ممکن نہیں ہوسکا۔ اب خیال ہے کہ سلمان کی فلم ’رادھے: یور موسٹ وانٹیڈ بھائی‘ دیوالی پر ریلیز ہوسکتی ہے۔