پوجا ہیگڑے سلمان خان کے ساتھ آنے والی فلم 'کبھی عید کبھی دیوالی' میں ایک ساتھ پردے پر نظر آئیں گی، تاہم اس تعلق سے انہوں نے حالیہ دنوں اپنے خیالات کا اظہار کیا۔ انہوں نے کہا کہ 'سلمان کے ساتھ کام کرنا ان کے لیے ایک چیلنجنگ تجربہ ہوگا۔'
پوجا نے حالیہ دنوں ایک انٹرویو میں کہا کہ سلمان چونکہ ایک تجربہ کار اور کہنہ مشق اداکار ہیں، اس لیے ایک طرف جہاں انہیں ان کے ساتھ کام کرنے میں تھوڑی گھبراہٹ ہے وہیں انہیں لگتا ہے کہ اس موقع پر انہیں سلمان سے بہت کچھ سیکھنے کا موقع ملے گا۔
انہوں نے اس بات کی بھی جانکاری دی کہ فلم کی کہانی دلچسپ اور مزاحیہ ہے۔
فلم کی شوٹنگ رواں برس جلد ہی شروع ہونے والی تھی تاہم موجودہ حالات کے پیش نظر اس میں تبدیلی کے قوی امکانات ہیں۔
فلم میں خاتون کردار کے تعلق سے بات کرتے ہوئے فلم کے پروڈیوسر ساجد ناڈیاڈوالا کا کہنا ہے کہ 'فلم ہاؤس فل فور میں ایک ساتھ کام کرنے کے بعد انہوں نے محسوس کیا کہ پوجا سکرین پر انتہائی جاذب نظر لگتی ہیں اور سلمان کے ساتھ ان کی جوڑی بھی بہت اچھی لگے گی۔ ان کی جوڑی فلم میں ایک نیا رنگ پیدا کرے گی۔'
