بالی ووڈ کے معروف اداکار پچاسی برس کے دھرمیندر دیول نے اپنے ٹویٹ میں کہا ہے کہ ' کسان بھائیوں کو تکلیف میں دیکھ کر وہ کافی درد محسوس کررہے ہیں، حکومت کو اس سلسلے میں جلد کچھ کرنا چاہیے'۔
اس ٹویٹ میں انھوں نے ایک تصویر بھی شیئر کی ہے جس میں وہ غمزدہ نظر آرہے ہیں۔
حالانکہ انھوں نے اس سے قبل کسانوں کے احتجاج سے متعلق ایک ٹویٹ بھی کیا تھا جسے ٹرولنگ کے بعد انھوں نے ڈیلیٹ کردیا تھا۔
بھارت میں متنازع زرعی قوانین کے خلاف کسانوں کی احتجاجی تحریک ہر گزرتے دن کے ساتھ زور پکڑ رہی ہے۔ منگل کو کسانوں نے اپنے مطالبات کے حق میں ’بھارت بند‘ منایا جس کی حمایت دو درجن سیاسی جماعتوں، کچھ مزدور تنظیموں اور ٹرانسپورٹ یونینز نے کی۔
کسان مرکزی حکومت کے منظور کردہ تین متنازع زرعی قوانین کی واپسی، اناج منڈیوں کو ختم نہ کرنے، اناج کی کم سے کم سپورٹ پرائس یا ایم ایس پی کو برقرار رکھنے اور کسانوں کے قرضے معاف کرنے کے مطالبات کو لے کر برسر احتجاج ہیں۔
