ریاست کرناٹک کے قومی ایوارڈ یافتہ اداکار سنچاری وجے جو ایک سڑک حادثے میں زخمی ہوگئے تھے گزشتہ روز ایک نجی اسپتال میں ان کی موت ہوگئی۔ اداکار کا علاج کرنے والے ایک ڈاکٹر نے بتایا کہ ان کے اہل خانہ نے اداکار کے اعضاء عطیہ کرنے کا فیصلہ کیا ہے۔
وزیراعلیٰ بی ایس یدی یورپا نے وجے کی موت پر تعزیت کرتے ہوئے دکھ کا اظہار کیا۔ واضح رہے کہ ہفتہ کی رات اداکار کی موٹر سائیکل شہر کے جے پی نگر میں پھسل کر گر گئی تھی، جس کی وجہ سے اداکار کے سر میں شدید چوٹ لگی تھی۔
وجے کو سنہ 2015 میں فلم 'نانو ایوانلا اولو' میں بہترین اداکاری کے لیے قومی ایوارڈ سے نوازا گیا تھا۔
ذرائع کے مطابق اداکار سنچاری وجے کی لاش کو رویندر کلاچھیتر کیمپس میں رکھا جائے گا۔ جہاں عام لوگ صبح 8 بجے سے صبح 10 بجے تک ان کا آخری درشن کر سکیں گے۔ ان کی آخری رسومات ان کے آبائی مقام کوڈور کے پنچن ہلی میں ریاستی اعزاز کے ساتھ ادا کی جائے گی۔
