اداکار رتیک روشن نے تقریبا چار سال قبل اداکارہ کنگنا رناوت سے متعلق ایک معاملہ درج کرایا تھا، جسے اب کرائم انٹیلیجنس یونٹ کو ٹرانسفر کردیا گیا ہے۔ کرائم برانچ کے ایک افسر نے اس کی جانکاری دی ہے۔
رتیک روشن کو 2013 سے 2014 کے درمیان 100 ای میل ملے تھے۔ بتایا گیا کہ یہ ای میل اداکارہ کنگنا رناوت کی ای میل آئی ڈی سے بھیجے گئے تھے جس کے بعد رتیک روشن نے 2017 کو سائبر سیل میں ایک شکایت درج کرائی تھی۔ اس وقت کنگنا نے کہا تھا کہ ان کی ای میل آئی ڈی کسی نے ہیک کرلی ہے اور انہوں نے اداکار ریتک روشن کو کبھی کوئی ای میل کیا ہی نہیں ہے۔
واضح رہے کہ اس سے پہلے بھی 2016 میں ریتک روشن نے نامعلوم فرد کے خلاف معاملہ درج کرایا تھا جس میں کہا گیا تھا کہ ایک شخص ان کے نام پر ایک ای میل آئی ڈی کا استعمال کرکے اداکارہ کنگنا رناوت سے مبینہ طور پر بات کرتا ہے۔
جس کے بعد روشن کے وکیل نے ممبئی کے پولیس کمشنر پرمویر سنگھ سے اس معاملے میں زیر تفتیش تحقیقات کے حوالے سے ملاقات کی۔ اس شکایت سے متعلق معاملہ باندرہ کرلا کمپلیکس کے سائبر پولیس اسٹیشن میں درج کیا گیا تھا۔
پولیس کے فارینسک ماہرین امریکہ کے مذکورہ ای میل آئی ڈی کے بارے میں کوئی حقائق اکٹھا نہیں کرسکے۔
لیکن اب اس معاملے میں کنگنا رناوت نے بھی اپنا ردعمل ظاہر کیا ہے۔
کنگنا نے ٹویٹ کرتے ہوئے کہا کہ اس کے رونے کی کہانی پھر سے شروع ہوگئی۔ ہمارے رشتے کو ختم ہوئے اور اس کے طلاق کو کتنے سال گزر چکے ہیں لیکن وہ آگے بڑھنا ہی نہیں چاہتا۔ وہ کسی اور خاتون سے رشتہ جوڑنا ہی نہیں چاہتا۔ جیسی ہی میں اپنی ذاتی زندگی میں کچھ امید پانے کے لیے ہمت جٹاتی ہوں، وہ پھر سے نیا ناٹک شروع کردیتا ہے۔ ریتک روشن کب تک روئے گا ایک چھوٹے سے افیئر کے لیے۔
