بالی وڈ کے دبنگ اسٹار سلمان خان نے اپنی آنے والی فلم ’رادھے: یور موسٹ وانٹیڈ بھائی‘ سے ہونے والی آمدنی سے کورونا مریضوں کی مدد کرنے کا فیصلہ کیا ہے۔
پربھودیوا کی ہدایتکاری میں بنی سلمان خان کی فلم ’رادھے: یور موسٹ وانٹیڈ بھائی‘ 13 مئی کو ریلیز ہونے والی ہے۔
بھارت میں کورونا کی دوسری لہر تیزی سے بڑھ رہی ہے۔ کورونا وبا کے دوران بالی وڈ کی متعدد مشہور شخصیات آگے آکر لوگوں کی مدد کررہے ہیں۔ سلمان خان بھی کورونا کے دور میں متاثرہ افراد اور فرنٹ لائن ورکرز کی مدد کرتے آرہے ہیں۔
سلمان خان اور زی انٹرٹینمنٹ نے فیصلہ کیا ہے کہ وہ کووڈ متاثرین کی مدد کے لیے آکسیجن سلنڈر، کنسٹریٹرس اور وینٹیلیٹرس عطیہ کریں گے۔ اس میں فلم ’ رادھے: یور موسٹ وانٹیڈ بھائی‘ سے ہونے والی آمدنی کا سب سے بڑا تعاون ہوگا۔
واضح رہے کہ ’رادھے: یور موسٹ وانٹیڈ بھائی‘ میں سلمان خان کے ساتھ دیشا پٹانی ، رندیپ ہوڈا اور جیکی شراف نے بھی اہم کردار نبھائے ہیں۔ فلم کو سلمان خان فلمز نے زی اسٹوڈیوز کے اشتراک سے پیش کیا ہے۔
