ریاست اترپردیش کے ضلع امروہہ کے علاقے گجرولا کے رہائشی شریف نے گجرالہ پولیس اسٹیشن کو اطلاع دی کہ اس کے پانچ سالہ نابالغ بیٹے عمران کا کسی نے اغوا کرلیا ہے اور اب اس سے تاوان کی رقم کا مطالبہ کیا جارہا ہے۔
اس کیس کے بارے میں اطلاع ملتے ہی پولیس محکمہ فوری چور پر مستعد ہوگیا اور واقعے کی سنگینی کے پیش نظر سپرنٹنڈنٹ پولیس وپن ٹڈا نے انسپکٹر گجرولا کو پولیس ٹیم تشکیل دینے اور بچے کی محفوظ برآمدگی کی ہدایت دی۔
پولیس نے بروقت کارروائی کرتے ہوئے ملزم کو چوبیس گھنٹوں کے اندر گرفتار کرلیا، ساتھ ہی بچہ کو بھی بحفاظت برآمد کرلیا گیا۔
امروہہ کے ایڈیشنل سپرنٹنڈنٹ پولیس اجے پرتاپ سنگھ نے بتایا کہ یہ پورا معاملہ قرض کی رقم سے متعلق ہے، بچے کے والد پر ایک شخص کا 35 ہزار روپے قرض تھا، جب بچے کے والد نے رقم نہیں دی تو اس شخص نے بچے کو ہی اغوا کرلیا اور اپنی رقم کا مطالبہ کرنے لگا۔
