یوکرین کے دارالحکومت کیف میں ایک نرسری کے قریب ہیلی کاپٹر کے حادثے میں وزیر داخلہ اور تین بچوں سمیت کم از کم 18 افراد ہلاک ہو گئے ہیں۔ یوکرین کی نیشنل پولیس کے سربراہ ایہور کلیمینکو کے مطابق بدھ کے روز ہلاک ہونے والوں میں وزیر داخلہ ڈینس موناسٹیرسکی، ان کے نائب یوہین ینن اور وزارت داخلہ کے ریاستی سیکرٹری یوری لبکووچ بھی شامل تھے۔ ابھی یہ فوری طور پر واضح نہیں ہو سکا کہ ہیلی کاپٹر برووری کے قصبے میں کس وجہ سے گر کر تباہ ہوا۔
علاقائی گورنر اولیکسی کولیبا نے ٹیلی گرام پر لکھا، اس حادثے میں 29 افراد زخمی بھی ہوئے جن میں 15 بچے بھی شامل ہیں۔ اس سانحہ کے وقت نرسری میں بچے اور عملہ موجود تھا۔ پولیس چیف اور ایمرجنسی سروسز نے بتایا کہ ہلاک ہونے والوں میں سے نو افراد ہیلی کاپٹر پر سوار تھے۔ کلیمینکو نے کہا کہ ہیلی کاپٹر اسٹیٹ ایمرجنسی سروس کا تھا۔یوکرین کے پراسیکیوٹر جنرل اینڈری کوسٹن نے ٹیلی گرام پر کہا کہ تحقیقات یوکرین کی سکیورٹی سروس کر رہی ہے۔
یوکرین کے صدر ولادیمیر زیلنسکی نے اس حادثے کو ایک خوفناک سانحہ قرار دیا۔ ٹیلیگرام پر، زیلنسکی نے کہا کہ آج کیف کے علاقے برووری میں ایک خوفناک سانحہ پیش آیا۔ ریاستی ایمرجنسی سروس کا ایک ہیلی کاپٹر گر کر تباہ ہو گیا، امدادی کارکن جائے وقوعہ پر موجود ہیں۔ انہوں نے مزید کہا کہ یوکرین کی سیکیورٹی سروس اور قومی پولیس سے تحقیقات کرنے کو کہا ہے۔
