سان فرانسسکو: سماجی رابطے کی ویب سائٹ ٹوئٹر نے بھارت سمیت دنیا بھر کے ہزاروں ٹوئٹر اکاؤنٹس کے بلیو ٹک ہٹا دیے ہیں۔ بھارت کے معروف اداکار امیتابھ بچن ہوں یا پاکستان کے سابق وزیراعظم عمران خان ہوں یا نامور فٹ بالر لیونل میسی یا نامور کرکٹر بابر اعظم یا ویراٹ کوہلی، ان سمیت دیگر کئی شخصیات اور اداروں کے ٹوئٹر اکاؤنٹ سے بلیو ٹک غائب ہوگیا ہے۔ دنیائے فٹ بال کے نامور کھلاڑی کرسٹیانو رونالڈو اور لیونل میسی کے ٹوئٹر اکاؤنٹ پر لاکھوں فالورز ہیں، ان کے اکاؤنٹ سے بھی بلیو ٹک ہٹا دیے گئے ہیں۔
ایلون مسک نے سبسکرپشن سروس ٹوئٹر بلیو ٹک کو دنیا بھر میں متعارف کرانے کے بعد 20 اپریل سے دنیا بھر سے صارفین کے اکاؤنٹس سے بلیو ٹک کو ہٹانے کا اعلان کیا تھا۔ایلون مسک نے اکتوبر 2022 میں ٹوئٹر کو خریدنے کے بعد مفت بلیو ٹک پروگرام کو کرپٹ قرار دیتے ہوئے اکاؤنٹ کو ویری فائیڈ کرانے کا عمل ماہانہ فیس سے مشروط کر دیا تھا۔تاہم ایلون مسک نے ٹویٹ کرتے ہوئے بتایا کہ یکم اپریل کے بجائے ’20 اپریل تک بلیو ٹک کو ہٹانے کا سلسلہ شروع ہو جائے گا۔‘ اس کا مطلب ہے کہ اگر آپ کے ٹوئٹر اکاؤنٹ میں بلیو ٹک موجود ہے تو آپ کو 20 اپریل کے بعد اسے برقرار رکھنا چاہتے ہیں تو آپ کو ادائیگی کرنا ہوگی۔
