نئی دہلی: ترکی اور شام میں آج صبح 7.8 شدت کے زلزلے کے جھٹکے محسوس کیے گئے۔ اس زلزلے میں مرنے والوں کی تعداد اب تک 360 سے تجاوز کرچکی ہے۔ ترکی میں زلزلے کے بعد آس پاس کے ممالک نے بھی الرٹ جاری کردئے ہیں۔ وہیں اٹلی نے سونامی کی وارننگ جاری کر دی ہے۔ اٹلی حکام نے لوگوں کو ساحلوں سے دور رہنے کو کہا ہے۔
جرمن ریسرچ سینٹر فار جیو سائنسز کا کہنا ہے کہ زلزلے کے جھٹکے ترکی کے جنوب مشرقی علاقے غازی انتیپ میں محسوس کیے گئے ہیں۔ تو وہیں، EMSC مانیٹرنگ سروس نے کہا کہ زلزلے سے ہونے والے نقصان کا جائزہ لیا جا رہا ہے۔ ترکی میں سنلیؤرفہ علاقے کے میئر نے بتایا ہے کہ زلزلے کے جھٹکوں سے اب تک 360 سے زائد افراد ہلاک ہو چکے ہیں۔ ترکی میں یہ زلزلہ مقامی وقت کے مطابق 4 بجکر 17 منٹ پر آیا تھا۔ زلزلے کا مرکز 17.9 کلومیٹر کی گہرائی میں تھا۔ لبنان میں بھی تقریباً 40 سیکنڈز تک زلزلے کے جھٹکے محسوس کیے گئے۔
مزید پڑھیں:
- Turkey Earthquake ترکی میں شدید زلزلے کے جھٹکے، پانچ سو ستر سے زائد افراد ہلاک، چار سو سے زیادہ زخمی
ذرائع کے مطابق ترکی میں زلزلے کے باعث 16 عمارتوں کے گرنے کی خبر ہے۔ صورتحال کے پیش نظر ترکی میں ہائی الرٹ جاری کر دیا گیا ہے۔ ترکی میں زلزلے کے جھٹکوں کے کئی ویڈیوز بھی سوشل میڈیا پر وائرل ہو رہے ہیں۔ ویڈیوز میں خوف زدہ لوگ ادھر ادھر بھاگتے نظر آ رہے ہیں۔ کئی افراد کے ملبے میں دبے ہونے کا بھی خدشہ ظاہر کیا جارہا ہے۔ بتایا جا رہا ہے کہ ترکی کے علاوہ شام اور لبنان میں بھی زلزلے کے جھٹکے محسوس کیے گئے ہیں۔ شام کے شہر الپو اور حما میں زلزلے سے زیادہ نقصان کی خبر ہے۔ دمشق میں بھی زلزلے کے جھٹکے محسوس ہونے کے بعد لوگ سڑکوں پر نکل آئے۔
