نیویارک: امریکہ میں نیویارک کے بفیلو واقع ایک سپرمارکٹ میں ایک بندوق بردار نے کم از کم دس لوگوں کو گولی مارکر ہلاک کردیا ہے۔ دی اسوسی ایٹ پریس کی ایک رپورٹ کے مطابق بندوق بردار نے رائفل کے ساتھ فوجی کپڑے اور جسم پر آرمر پہن رکھا تھا اور سیاہ فام لوگوں کی اکثریت والے علاقے کے پڑوس میں واقع سپر مارکٹ میں داخل ہونے کے بعد گولیاں چلانی شروع کردیں۔ ادھر بفیلو پولیس محکمے نے ٹویٹ کیا، 'بندوق بردار کو حراست میں لے لیا گیا ہے۔' Ten Dead in Buffalo Supermarket Attack
حملہ آور کی شناخت پیٹن گینڈرون کے نام سے ہوئی ہے جو بفیلو سے تقریباً 320 کلومیٹر جنوب مشرق میں نیویارک کے علاقے کونکلن کا رہائشی ہے۔ ابھی تک یہ واضح نہیں ہے کہ وہ حملہ کرنے کے لیے کونکلن سے بفیلو کیوں آیا تھا۔ سوشل میڈیا پر جاری ہونے والی ایک پوسٹ میں اسے اپنی گاڑی سے سپر مارکیٹ پہنچتے دیکھا جا سکتا ہے۔ بفیلو پولیس کمشنر جوزف گرامگلیا نے بتایا کہ حملہ آور نے اسٹور کے باہر چار افراد کو گولی ماری۔
