پاکستان کے سابق کرکٹر شعیب اختر Shoaib Akhtar حج ادا کرنے کے لیے سعودی عرب پہنچ گئے۔ سعودی پہنچنے کے بعد انہوں نے کلاک ٹاور سے اپنے مداحوں کو مقدس مقام خانہ کعبہ دکھایا۔ شعیب اختر پاکستان سے بطور اسٹیٹ گیسٹ سعودی عرب پہنچے ہیں۔ شعیب اختر ہفتے کے روز سعودی عرب روانہ ہوئے۔ اس موقع پر انھوں نے ایک ویڈیو شیئر کیا ہے، جس کو دیکھ کر یہ اندازہ لگایا جا سکتا ہے کہ انھوں نے یہ ویڈیو سعودی عرب کے کلاک ٹاور سے شوٹ کیا ہے۔ شعیب اختر نے ویڈیو میں خانہ کعبہ کی جھلک دکھائی ہے اور اس ویڈیو کو اپنے ٹویٹر اکاونٹ پر شیئر کرتے ہوئے لکھا ہے کہ مکہ کلاک ٹاور کی چوٹی سے خانہ کعبہ کا منظر۔ سبحان اللہ۔
شعیب اختر اپنے حج سے متعلق ہر اپ ڈیٹ سوشل میڈیا پر دے رہے ہیں۔ حج پر جانے سے قبل شعیب اختر نے اپنی تصویر سوشل میڈیا پر شیئر کی۔اس کے ساتھ انہوں نے لکھا کہ "میں سعودی عرب کے اسٹیٹ گیسٹ کے طور پر حج پر جا رہا ہوں، وہاں مکہ میں مسلم ممالک کے رہنماؤں کے ساتھ حج کانفرنس سے بھی خطاب کروں گا، میں سعودی عرب کے پاکستانی سفارت خانے کا شکر گزار ہوں۔
واضح رہے کہ سال 2019 میں دنیا بھر سے 25 لاکھ عازمین حج سعودی عرب پہنچے تھے۔ لیکن کورونا وائرس کی وجہ سے سال 2020 میں سعودی حکام نے صرف 1000 مقامی لوگوں کو حج کی اجازت دی۔ سال 2021 میں قرعہ اندازی کے تحت 60 ہزار افراد کو حج کے لیے منتخب کیا گیا تھا۔ لیکن اس سال 10 لاکھ لوگوں کو حج کی اجازت دی گئی ہے۔
