واشنگٹن: کانگریس لیڈر راہل گاندھی نے بدھ کو سلیکن ویلی میں اسٹارٹ اپ کاروباریوں سے ملاقات کی۔ اس دوران راہل گاندھی نے مختلف مسائل پر تبادلہ خیال کیا۔ سلیکون ویلی میں مقیم اسٹارٹ اپ انٹرپرینیورز کو مصنوعی ذہانت اور جدید ٹیکنالوجیز کے میدان میں کام کرنے کے لیے جانا جاتا ہے۔ اس میٹنگ میں راہل گاندھی کے ساتھ انڈین اوورسیز کانگریس کے چیرپرسن سیم پترودا اور بھارتی نژاد لوگ بڑی تعداد میں موجود تھے، جس میں مصنوعی ذہانت کے مختلف پہلوؤں، بگ ڈیٹا، مشین لرننگ، عام طور پر بنی نوع انسان پر ان کے اثرات اور گورننس، سماجی بہبود کے اقدامات اور غلط معلومات جیسے مسائل پر تبادلہ خیال کیا گیا۔
واضح رہے کہ کیلیفورنیا میں سنی ویلی کا پلگ اینڈ پلے ٹیک سینٹر اسٹارٹ اپس کے سب سے بڑے انکیوبیٹرز میں سے ایک ہے۔ اس کے سی ای او اور بانی سعید امیدی کے مطابق، پلگ اینڈ پلے کے 50 فیصد سے زیادہ اسٹارٹ اپ کے بانی بھارتی یا بھارتی نژاد امریکی ہیں۔ امیدی نے تقریب کے بعد پی ٹی آئی کو بتایا کہ راہل گاندھی نے آئی ٹی سیکٹر کی گہری سمجھ کا مظاہرہ کیا۔ جدید ترین اور نئی ٹیکنالوجی کے بارے میں ان کا علم متاثر کن ہے۔
بی جے پی نے اداروں پر قبضہ کیا
فکسنکس اسٹارٹ اپ کے بانی سعید امیدی اور شان سنکرن کے ساتھ بات چیت میں حصہ لیتے ہوئے راہل گاندھی نے تمام ٹیکنالوجی کو بھارت کے دور دراز دیہاتوں میں عام آدمی پر پڑنے والے اثرات سے جوڑنے کی کوشش کی۔ ایک سوال کے جواب میں انہوں نے کہا کہ اگر آپ بھارت میں کسی ٹیکنالوجی کو پھیلانا چاہتے ہیں تو اس کے لیے طاقت کا غیر مرتکز ہونا ضروری ہے۔ راہل گاندھی نے کہا کہ اس وقت بڑے پیمانے پر نوکر شاہی کی رکاوٹوں کا سامنا کرنا پڑتا ہے۔ بی جے پی نے ملک کے اداروں پر قبضہ کر لیا ہے۔
راہل گاندھی نے کہا کہ بھارت جیسے ممالک نے ٹکنالوجی کی حقیقی طاقت کو پہچان لیا ہے۔ ڈیٹا کے تحفظ اور حفاظت کے حوالے سے مناسب ضوابط کی ضرورت ہے۔ تاہم پیگاسس اسپائی ویئر اور اسی طرح کی ٹیکنالوجیز کے معاملے پر راہل گاندھی نے حاضرین سے کہا کہ وہ اس بارے میں پریشان نہیں ہیں۔ انہوں نے ایک پرانی یاد تازہ کرتے ہوئے کہا کہ ایک موقعے پر انہیں معلوم ہو گیا تھا کہ ان کا فون ٹیپ کیا جا رہا ہے اور انہوں نے فون پر مذاق میں کہا تھا تھا 'ہیلو! مسٹر مودی۔'
انہوں نے کہا کہ میں لگا تھا کہ میرا آئی فون ٹیپ ہو رہا ہے۔ ایسی صورت حال میں، بحیثیت قوم اور فرد کے طور پر ڈیٹا کی رازداری کے حوالے سے قوانین بنانے کی ضرورت ہے۔ انہوں نے کہا کہ اگر کوئی بھی حکومت طے کرتی ہے کہ وہ آپ کا فون ٹیپ کرنا چاہتی ہے تو اسے کوئی نہیں روک سکتا۔ انہوں نے دعویٰ کیا کہ اگر ملک فون ٹیپنگ میں دلچسپی رکھتا ہے تو یہ لڑنے کے لائق لڑائی نہیں ہے۔ مجھے لگتا ہے کہ میں جو کچھ بھی کرتا ہوں اور جیسا بھی کام کرتا ہوں، اس کی جانکاری حکومت کے لیے ہمہ وقت دستیاب ہے۔
