اسلام آباد: پاکستان الیکٹرانک میڈیا ریگولیٹری اتھارٹی (پیمرا) نے تمام سیٹلائٹ ٹی وی چینلز پر فوری اثر سے سابق وزیر اعظم اور پاکستان تحریک انصاف (پی ٹی آئی) کے چیئرمین کی لائیو اور ریکارڈ شدہ تقاریر اور پریس کانفرنسوں کو نشر کرنے پر پابندی عائد کر دی ہے۔ پیمرا نے کہا کہ یہ دیکھا گیا ہے کہ عمران خان اپنی تقاریر/بیانات میں ریاستی اداروں پر مسلسل بے بنیاد الزامات لگا رہے ہیں اور ریاستی اداروں اور افسران کے خلاف اپنے اشتعال انگیز بیانات کے ذریعے نفرت انگیز تقریریں پھیلا رہے ہیں جس سے ملک میں امن و امان کی صورت حال خراب ہوسکتی ہے۔
پیمرا کے مطابق ریاستی اداروں اور افسران کے خلاف بے بنیاد الزامات، نفرت انگیز، بہتان پر مبنی اور غیر ضروری بیان نشر کرنا آئین پاکستان کے آرٹیکل 19 کی سراسر خلاف ورزی ہے اور سپریم کورٹ آف پاکستان کے ایک از خود نوٹس میں دیے گئے فیصلے کی خلاف ورزی ہے۔ میڈیا ریگولیٹری اتھارٹی نے مزید کہا کہ عمران کی تقریر کے مواد کا تجزیہ کرنے کے بعد دیکھا گیا ہے کہ لائسنس یافتہ افراد نے بغیر کسی موثر ٹائم ڈیل میکنزم کے مواد کو لائیو نشر کیا جو کہ پیمرا قوانین کی خلاف ورزی اور عدالتوں کے فیصلوں کی نافرمانی ہے۔
یہ بھی پڑھیں:
- Imran Khan's Speech at Zaman Park جن سے میری جان کو خطرہ ہے وہی لوگ اقتدار میں بیٹھے ہیں، عمران خان
- Toshakhna Case پولیس عمران کو حراست میں لینے ان کی رہائش گاہ پہنچی
پیمرا نے تمام سیٹلائٹ ٹی وی چینلز کو مزید ہدایت کی کہ الیکٹرانک میڈیا (پروگرامز اینڈ ایڈورٹائزمنٹ) کوڈ آف کنڈکٹ 2015 کی شق 17 کے تحت ایک غیر جانبدار ایڈیٹوریل بورڈ تشکیل دیا جائے تاکہ اس بات کو یقینی بنایا جا سکے کہ ان کے پلیٹ فارم کو کوئی بھی کسی طریقے سے ان ریمارکس کے لیے استعمال نہ کرسکے جو توہین آمیز اور کسی بھی ریاستی ادارے کے خلاف اور نفرت انگیز، امن و امان کی صورتحال کے لیے متعصبانہ ہو۔ اور کسی بھی خلاف ورزی کی صورت میں پیمرا قوانین کے مطابق قانونی کارروائی کا انتباہ دیا۔
