ادے پور: نیپال کے سابق نائب وزیر اعظم بملیندر ندھی نے کہا کہ ہند-نیپال تعلقات کے ثقافتی اور تاریخی رشتے لوگوں نے بنائے ہیں جنہیں کبھی نہیں توڑا جا سکتا۔ ویملیندر ندھی منگل کو ادے پور میں بھوپال نوبلس یونیورسٹی کے کمبھا آڈیٹوریم میں بھارت-نیپال کے ثقافتی اور تاریخی تعلقات پر سمینار سے بحیثیت مہمان خصوصی خطاب کررہے تھے۔ انہوں نے کہا کہ ہندوستان اور نیپال میں کئی پہلوؤں سے مماثلت ہے اور نیپال کی ترقی بھی ہندوستان کی ترقی سے جڑی ہوئی ہے۔ جہاں ہندوستان جمہوریت پر یقین رکھتا ہے، جہاں ایک جمہوری طرز حکمرانی کا نظام ہے، نیپال میں بھی سیاسی نقطہ نظر سے یہی نظام ہے۔
انہوں نے کہا کہ ہندوستان کی آزادی کی تحریک میں نیپال کے قائدین اور عوام کا انمول حصہ رہا ہے جسے کبھی فراموش نہیں کیا جاسکتا، جب کہ ہندوستان نے بھی نیپال کی جمہوریت کی مضبوطی کے لیے اپنا بھرپور تعاون دیا ہے۔ موٹے طور پر دیکھا جائے تو ہندوستان اور نیپال کا سیاسی فلسفہ ایک جیسا ہے۔ ہندوستان کے ثقافتی، مذہبی اور سماجی عقائد مساوات لئے ہوئے ہیں۔ اپنے خطاب میں انہوں نے نیپال اور میواڑ کے تعلقات پر بھی روشنی ڈالی ، اس سلسلے میں انہوں نے تھارو برادری کا ذکر کیا ، جو راجستھان کے تھار سے وہاں گئے تھے۔
یہ بھی پڑھیں: PM Modi and Nepal PM Talks ہند نیپال وزرائے اعظم کی ملاقات، باہمی تعلقات کو بلندیوں پر لے جانے کا عزم
انہوں نے کہا کہ کسی بھی ملک کی مجموعی ترقی میں وہاں کی یونیورسٹیاں اہم کردار ادا کرتی ہیں۔ یونیورسٹیاں ایسے ٹھوس اوزار ہیں جو انقلاب اور ترقی کو ایک نئی جہت فراہم کرتی ہیں۔ اس سے قبل بھوپال نوبلس انسٹی ٹیوٹ کے قائم مقام صدر پروفیسر کرنل شیو سنگھ سارنگ دیوتے نے ہند-نیپال تعلقات پر اپنے خیالات رکھتے ہوئے کہا کہ ہند-نیپال کے ثقافتی تعلقات زمانہ قدیم سے موجود ہیں، اس لیے ہم کہہ سکتے ہیں کہ ہندوستان اور نیپال کا مذہب اور ثقافت کے نقطہ نظر سے گہرا تعلق ہے۔
یو این آئی
