کرویزاوا : گروپ آف سیون ممالک کے وزرائے خارجہ نے یوکرین کے خلاف روس کی جارحیت کی سخت ترین الفاظ میں مذمت کی ہے اور خبردار کیا ہے کہ ماسکو کی جانب سے کیمیائی، حیاتیاتی یا جوہری ہتھیاروں کے کسی بھی استعمال کا سنگین نتائج کا سامنا کیا جائے گا۔ وسطی جاپان کے ریزورٹ قصبے کرویزاوا میں دو روزہ جی سیون مذاکرات کے بعد جاری ہونے والے ایک مشترکہ بیان میں، جی سیون ممالک کے اعلیٰ سفارت کاروں نے تیسرے فریقوں سے روس کی جنگ میں مدد بند کرنے یا پھر انھیں سنگین نتائج بھگتنے کے لیے تیار رہنا چاہیے۔ بیان میں کہا گیا ہے کہ ہم روس کو ہتھیار فراہم کرنے والے تیسرے فریق کو روکنے اور ان کا جواب دینے کے لیے اپنے رکن ممالک کے درمیان ہم آہنگی کو مضبوط کریں گے اور ان لوگوں کے خلاف کارروائیاں جاری رکھیں گے جو یوکرین کے خلاف روس کی جنگ کی مادی طور پر حمایت کرتے ہیں۔
برطانیہ، کینیڈا، فرانس، جرمنی، اٹلی، جاپان اور امریکہ پر مشتمل جی سیون گروپ کے اعلیٰ سفارت کاروں کے علاوہ یورپی یونین نے بھی بیلاروس میں جوہری ہتھیار رکھنے کے لیے روسی دھمکی کو ناقابل قبول قرار دیا۔ انھوں نے یہ بھی کہا کہ یوکرین کے خلاف روس کی جارحیت کی جنگ اقوام متحدہ کے چارٹر سمیت بین الاقوامی قوانین کی سنگین خلاف ورزی ہے، جی سیون کے رہنماؤں نے اس بات کا اعادہ کیا کہ روس کو یوکرین سے فوری طور پر اور غیر مشروط طور پر تمام افواج اور ساز و سامان واپس لینا چاہیے۔
گروپ میں اپنے مشترکہ بیان میں یہ بھی کہا کہ ہم آج یوکرین کی آخری وقت تک حمایت کرنے کے لیے دوبارہ عہد کرتے ہیں اور یوکرین کو اپنے دفاع، اس کے آزاد اور جمہوری مستقبل کو محفوظ بنانے، اور مستقبل میں روسی جارحیت کو روکنے میں مدد کے لیے مستقل سیکورٹی، اقتصادی اور ادارہ جاتی مدد فراہم کی جائے گی۔ ہم یوکرین کی اہم توانائی اور ماحولیاتی بنیادی ڈھانچے کی مرمت اور بحالی میں مدد جاری رکھیں گے اور یوکرین کی توانائی کی حفاظت کے لیے اپنی مضبوط حمایت پر دوبارہ زور دیں گے۔
جی سیون وزراء کے مشترکہ بیان میں کہا گیا کہ ہم بین الاقوامی جوہری توانائی ایجنسی (IAEA) کی کوششوں کی حمایت کرتے ہیں جو یوکرین میں جوہری تحفظ اور سلامتی کو مضبوط بنانے میں مدد کرتے ہیں۔ بیان میں مزید کہا گیا ہے کہ جنگی جرائم اور دیگر مظالم جیسے کہ شہریوں اور اہم شہری انفراسٹرکچر کے خلاف روس کے حملوں کے لیے کوئی استثنیٰ نہیں ہو سکتا۔ اس نے بچوں سمیت یوکرینی باشندوں کی غیر قانونی منتقلی اور ملک بدری اور یوکرینیوں کے خلاف تنازعات سے متعلق جنسی تشدد کی بھی مذمت کی اور ذمہ داروں کو بین الاقوامی قانون کے مطابق احتساب کرنے کے اپنے عزم کا اعادہ کرتے ہوئے جی سیون رہنماؤں نے یوکرین کے عدالتی نظام میں قائم ایک بین الاقوامی ٹریبونل کے قیام کی حمایت کی تاکہ یوکرین کے خلاف جارحیت کے جرم کا مقدمہ چلایا جا سکے۔
یہ بھی پڑھیں:
- جاپانی وزیراعظم کی یوکرینی صدر سے ملاقات، دوطرفہ تعلقات بڑھانے پر زور
- جی سیون ممالک کا طالبان سے خواتین ملازمین پر پابندی کے فیصلے کو واپس لینے کا مطالبہ
اس کے علاوہ جی سیون رہنماؤں نے یوکرینی ثقافتی املاک اور ورثے کے تحفظ کی اہمیت پر زور دیا جنہیں جنگ سے نقصان پہنچا اور خطرہ لاحق ہوا۔ روس کی جانب سے خوراک اور توانائی کے وسائل کو ہتھیار بنانے سے معاشی کمزوریوں میں اضافہ ہوا ہے اور عالمی خوراک اور توانائی کے عدم تحفظ میں اضافہ ہوا ہے۔ ہم متاثرہ ممالک اور آبادیوں کی مدد کے لیے خوراک سے متعلق امداد سمیت امداد فراہم کرتے رہیں گے۔
جی سیون کے وزراء نے وسطی ایشیائی ممالک کی خودمختاری، آزادی اور علاقائی سالمیت کی حمایت کرنے کے اپنے ارادے کی بھی تصدیق کی۔ بیان میں کہا گیا کہ ہم علاقائی چیلنجوں سے نمٹنے کے لیے وسطی ایشیائی ممالک کے ساتھ مل کر کام کرنے کا عہد کرتے ہیں، جن میں روس کی جارحیت کی جنگ کے نتائج، افغانستان کی صورت حال کے غیر مستحکم اثرات، خوراک اور توانائی کی عدم تحفظ، دہشت گردی اور موسمیاتی تبدیلی کے نتائج شامل ہیں۔
جی سیون وزراء نے اس بات پر بھی اتفاق کیا کہ آبنائے تائیوان میں امن و سلامتی، عالمی برادری میں سلامتی اور خوشحالی کے لیے ناگزیر عنصر ہے اور بحیرہ جنوبی چین کی عسکریت پسندی کی مخالفت کی۔ انہوں نے بیجنگ سے مطالبہ کیا کہ وہ بین الاقوامی برادری کے ذمہ دار رکن کے طور پر کام کرے۔ مشترکہ اعلامیے میں یہ مطالبہ بھی شامل تھا کہ شمالی کوریا نئے جوہری تجربات یا بیلسٹک میزائل لانچوں سے پرہیز کرے۔
