کراچی: پاکستان کے شورش زدہ صوبہ بلوچستان کے ضلع ہرنائی کے علاقے خوشت میں پیر کو نامعلوم مسلح حملہ آوروں نے ایک کوئلے کی کان پر حملہ کردیا، جس کے نتیجے میں کم از کم چار مزدور ہلاک اور تین دیگر زخمی ہوگئے۔ مقامی حکام نے بتایا کہ یہ واقعہ شدت پسند گروپوں سے تعلق رکھنے والے عسکریت پسندوں کی جانب سے ٹارگٹڈ حملہ معلوم ہوتا ہے۔
انہوں نے کہا کہ مسلح افراد نے صبح سویرے کان پر حملہ کیا اور وہاں کام کرنے والے مزدوروں پر گولیاں چلا دیں۔ فائرنگ کے نتیجے میں چار افراد ہلاک جبکہ تین زخمی ہوگئے۔ زخمی مزدوروں کو ہرنائی کے ڈسٹرکٹ ہیڈ کوارٹر ہسپتال میں داخل کرایا گیا ہے۔ حکام نے بتایا کہ مشتبہ افراد نے کوئلے کی 11 کانوں کو آگ بھی لگا دی۔ مقامی میڈیا کے مطابق فورسز نے علاقے کو گھیرے میں لے لیا ہے اور مشتبہ افراد کی تلاش جاری ہے۔
وہیں دوسری جانب پاکستانی پولیس نے شمالی وزیرستان میں فائرنگ کے تبادلے میں دو عسکریت پسندوں کو ہلاک کرنے کی تصدیو کی ہے۔ انٹر سروسز پبلک ریلیشنز (آئی ایس پی آر) نے بتایا کہ شمالی وزیرستان کے علاقے اسپن وام میں سیکیورٹی اہلکاروں کے ساتھ فائرنگ کے تبادلے میں دو دہشت گردوں کو ہلاک اور دو کو حراست میں لے لیا۔
یہ بھی پڑھیں:
- Pakistanis in Italy Boat Tragedy اٹلی میں ہونے والے کشتی حادثے میں اٹھائیس پاکستانی بھی جاں بحق
- Karachi Attack کراچی پولیس چیف کے دفتر پر حملے میں عسکریت پسندوں سمیت سات افراد ہلاک، متعدد زخمی
فوج کے میڈیا ونگ کے مطابق، عسکریت پسندوں کے ساتھ لڑائی کے دوران پاک فوج کے دو سپاہی، سپاہی عمران اللہ اور سپاہی افضل خان بھی مارے گئے۔پاکستان میں اس طرح کے دہشت گردی کے واقعات بڑھ رہے ہیں۔ حال ہی میں، 17 فروری کو، کراچی پولیس چیف کے دفتر پر جاری دہشت گردانہ حملے میں، پاکستانی سیکیورٹی فورسز کے ساتھ فائرنگ کے تبادلے میں پانچ دہشت گرد مارے گئے تھے۔
قابل ذکر ہے کہ اسلامک اسٹیٹ (آئی ایس) اور پاکستانی طالبان (ٹی ٹی پی) سے وابستہ باغیوں اور عسکریت پسندوں نے صوبے بلوچستان اور دیگر صوبوں میں حملوں میں اضافہ کر دیا ہے۔ اتوار کو بارکھان ضلع کے ایک بازار میں ہونے والے بم دھماکے میں پانچ افراد ہلاک اور 16 زخمی ہو گئے تھے۔
