کیرالہ کے وزیراعلی پنارائی وجین نے بحرین کے وزیراعظم خلیفہ بن سلمان الخلیفہ کے انتقال پر تعزیت کی۔
پنارائی وجین نے بحرین میں مقیم ملیالیوں سمیت بھارتی برادری کی جانب سے گہرے دکھ کا اظہار کیا ہے۔
وزیراعلی وجین نے اپنے تعزیتی پیغام میں کہا 'وزیراعظم خلیفہ بن سلمان الخلیفہ نے آدھی صدی تک بحرین کی قیادت کی اور وہ بھارت کے بہت قریب رہنما تھے'۔
انہوں نے مزید کہا کہ 'سنہ 2017 میں مجھے بحرین میں ان سے ملنے کا موقع ملا۔ انہوں نے تعلیم، سیاحت، آیور وید اور صحت کے شعبوں میں کیرالہ کے ساتھ مزید تعاون میں گہری دلچسپی کا اظہار کیا تھا'۔
بحرین کے سرکاری میڈیا نے گیارہ نومبر 2020 کو اطلاع دی ہے کہ بحرین میں سب سے طویل عرصے تک اپنی خدمات انجام دینے والے وزیراعظم شیخ خلیفہ بن سلمان آل خلیفہ کی 84 سال کی عمر میں انتقال ہوگیا۔
بحرین کی ایک خبر رساں ایجنسی نے بتایا کہ 'ملک بھر میں ان کی وفات کے بعد نے سرکاری طور پر سوگ منایا گیا۔ ریاستہائے متحدہ امریکہ کے میو کلینک اسپتال میں ان کا علاج کے دوران انتقال ہوگیا'۔
بھارتی وزیراعظم نریندر مودی نے بھی بدھ کے روز تعزیت کی تھی۔
وزیر اعظم مودی نے ٹویٹر پر لکھا کہ 'بحرین کے بادشاہ کے وزیراعظم شہزادہ خلیفہ بن سلمان آل خلیفہ کے انتقال پر میری دلی تعزیت! میں غمزدہ بحرین کے عوام میں شریک ہوں'۔
- مزید پڑھیں: وزیراعظم بحرین خلیفہ بن سلمان آل خلیفہ کا انتقال
بحرین کے شاہ شیخ حمد بن عیسیٰ آل خلیفہ نے ہفتہ بھر سرکاری طور پر سوگ کا اعلان کیا۔
واضح رہے کہ خلیفہ بن سلمان الخلیفہ دنیا کے طویل عرصے تک کام کرنے والے وزرائے اعظم میں سے ایک تھے۔
شیخ خلیفہ بن سلمان بحرین کے طویل ترین دورانیے تک وزیر اعظم رہے۔ وہ 1970 میں بحرین کے وزیر اعظم بنے تھے اور اپنی وفات تک اس عہدے پر فائز رہے۔
