ویسٹ بینک کے شہر نابلس میں اسرائیلی فوج نے سترہ سالہ فلسطینی نوجوان عطااللہ ریان کو ایک فوجی چوکی کے قریب گولی مار کر ہلاک کر دیا۔ اسرائیلی فوج کا الزام ہے کہ فلسطینی نوجوان اسرائیلی فوجیوں پر حملہ کرنے کی کوشش کر رہا تھا۔
اسرائیلی فوج کے ایک بیان کے مطابق سترہ سالہ عطااللہ ریان نے ایریل بستی جنکشن پر تعینات اسرائیلی فوجیوں پر چاقو سے حملہ کرنے کی کوشش کی۔
بیان میں کہا گیا ہے کہ فوجی چوکی پر موجود فوجیوں نے ایک حملہ آور کو دیکھا جس نے دو (اسرائیلی) فوجیوں پر چاقو سے حملہ کرنے کی کوشش کی تھی۔
اسرائیلی فوج کا مزید کہنا ہے کہ حملہ آور نے متعدد بار ان پر حملہ کرنے کی کوشش کی اور اسی دوران ان کے کمانڈر نے اسے گولی مار دی۔
یہ بھی پڑھیں: بھارتی کسانوں کی حمایت میں نیو یارک اور واشنگٹن میں احتجاج
اس بیان میں واضح کیا گیا ہے کہ اسرائیلی فوجیوں کا کوئی جانی نقصان نہیں ہوا ہے۔
دوسری جانب فلسطین کی وزارت صحت نے اس امر کی تصدیق کی ہے کہ قابض فورسیز نے ایک شہری کو گولی مار کر ہلاک کر دیا ہے۔
فلسطین اور اسرائیل میں انسانی حقوق کے گروپوں نے اسرائیلی حکومت پر الزام لگایا ہے کہ وہ فلسطینیوں کے خلاف حد سے زیادہ طاقت کا استعمال کر رہی ہے۔ انہوں نے کہا کہ کچھ مشتبہ حملہ آوروں کو ہلاک کیا گیا ہے جنھیں آسانی سے گرفتار کیا جاسکتا تھا۔
واضح رہے کہ اس سے قبل اسرائیلی فوج کے ہاتھوں نہتے فلسطینیوں کے قتل کے متعدد واقعات پیش آچکے ہیں۔ اسرائیلی فوج نے سنہ 1967 کی چھ روزہ جنگ کے بعد سے غربِ اردن پر قبضہ کر رکھا ہے۔ علاقے میں اسرائیلی فوج اور فلسطینی نوجوانوں کے درمیان جھڑپیں ہوتی رہتی ہیں۔
