ایران کے وزارت دفاع میں ایئرو اسپیس شعبے کے ترجمان مہندس حسینی کا کہنا ہے کہ ذوالجناح تحقیقاتی راکٹ کی لانچنگ، پیشرفتہ ٹکنالوجی کے ساتھ انجام پائی اور اس میں ٹھوس ایندھن والے طاقتور انجن کا پہلی بار استعمال کیا گیا۔
انہوں نے ایران کے نیشنل ٹی وی چینل سے گفتگو کرتے ہوئے کہا کہ ملک کی وزارت دفاع کے ماہرین کی کوششوں سے ٹھوس ایندھن کے انجن سے کام کرنے والے راکٹ ذوالجناح کا کامیاب تجربہ کیا گیا۔
انہوں نے کہا کہ راکٹ کی یہ لانچنگ تین مرحلوں پر مبنی تھی جس میں پہلے اور دوسرے مرحلے میں ٹھوس ایندھن کا استعمال کیا گیا۔
ان کا کہنا ہے کہ ٹھوس ایندھن کی وجہ سے اس راکٹ میں 220 کلو وزن اٹھانے کی توانائی پیدا ہوگئی جبکہ مدار میں یہ 500 کلومیٹر کی جگہ لے گا۔
راکٹ کی فوٹیج میں یہ ظاہر ہوتا ہے کہ لانچ صحرا میں دن کے وقت ہوا ہے۔
رپورٹ میں یہ نہیں بتایا گیا ہے کہ یہ لانچ کب اور کہاں ہوئی ہے؟
اس راکٹ کا نام ذوالجناح ہے جو حضرت محمدﷺ کے نواسے حضرت امام حسینؓ کے گھوڑے کے نام پر رکھا گیا ہے۔ اس نام سے ابھی تک کسی مصنوعی سیارہ کو مدار میں نہیں بھیجا گیا ہے۔
سیٹلائٹ کیریئر 25.5 میٹر (84 فٹ) لمبا اور 52 ٹن وزنی ہے۔
یہ بھی پڑھیں: شام: دو کار بم دھماکوں میں بچوں سمیت 13 افراد ہلاک
ایران اکثر اپنے نئے فوجی اور سائنسی منصوبوں کے ٹیسٹ قومی تعطیلات کے ساتھ مربوط کرتا ہے۔
اس کامیابی کا جشن ایران فروری میں اسلامی انقلاب کی 42 ویں برسی کے موقع پر منائے گا۔
امریکہ اور دوسرے مغربی ممالک کو طویل عرصے سے اس پروگرام پر شک تھا کیونکہ اسی ٹیکنالوجی کو طویل فاصلے تک مار کرنے والے میزائل تیار کرنے کے لیے استعمال کیا جاسکتا ہے۔
