بھارتی ڈاکٹر کی یو اے ای میں کورونا سے موت

بھارتی ڈاکٹر سدھیر رام بھاؤ واشمکر کی العین میں واقع ایک ہسپتال میں کورونا وائرس سے موت ہوگئی ہے۔

ریاست مہاراشٹر کے رہنے والے 61 سالہ ڈاکٹر واشمکر کی العین کے ایک ہسپتال میں موت ہوگئی۔ وہ وی پی ایس ہیلتھ کیئر نیٹ ورک کے العین میں برجیل رائل ہسپتال سے منسلک تھے۔ ہسپتال نے بیان جاری کرکے ڈاکٹر واشمکر کی کورونا انفیکشن سے موت ہو جانے کی تصدیق کی ہے۔

ڈاکٹر واشمکر العین میں کووڈ۔19 مریضوں کا علاج کرنے کے دوران اس وائرس کی زد میں آگئے۔ انہیں گزشتہ نو مئی کو جانچ رپورٹ میں کورونا انفیکشن ہونے کی تصدیق کے بعد 11 مئی کو العین ہسپتال میں داخل کرایا گیا تھا۔

العین میں وی پی ایس کے ریجنل ڈائریکٹر ڈاکٹر ارون مینن نے ڈاکٹر واشمکر کی موت پر افسوس کرتے ہوئے اسے انسٹی ٹیوٹ کے لیے ایک عظیم نقصان بتایا ہے۔