اسرائیلی فوج اور حماس کے عسکریت پسندوں کے مابین ہونے والی جنگ کے بعد منگل کے روز غزہ کے کرم شالوم چیک پوائنٹ سے اسرائیل کی جانب زرعی برآمدات کو دوبارہ شروع کر دیا گیا ہے۔ اسرائیل اور حماس کے درمیان ہونے والی جنگ کے دوران تقریباً چالیس روز قبل اسے معطل کر دیا گیا تھا۔
اسرائیلی حکومت کی جانب سے محدوو برآمدات کو دوبارہ شروع کرنے کی اجازت دینے کے فیصلے کے بعد سبزیوں کے ٹرک کرم شالوم چیک پوائنٹ سے گزرے۔
یہ پیشرفت اس وقت ہوئی جب اسرائیل نے غزہ کی پٹی پر کچھ پابندیوں میں آسانی کی۔
گزشتہ ماہ جنگ اس وقت شروع ہوئی جب یروشلم اور دیگر اسرائیلی قصبوں کی طرف حماس کے عسکریت پسندوں نے غزہ سے سیکڑوں راکٹ فائر کئے۔
حماس کا کہنا ہے کہ یہ حملے اسرائیلی پولیس کے چھاپوں اور مسجد اقصیٰ میں فلسطینی لوگوں کے خلاف پیلٹ گن اور ہتھگولے کے استعمال کے علاوہ عرب محلے سے فلسطینی خاندانوں کو بے دخل کرنے کے اسرائیلی منصوبے کے ردعمل کے طور پر کئے گئے۔
اس دوران اسرائیل کے فضائی حملوں میں 250 سے زیادہ فلسطینی ہلاک اور ہزاروں زخمی ہوئے جبکہ غزہ کی پٹی میں فضائی حملوں کے باعث زیادہ تر عمارت تباہ ہو گئی۔
