انگلینڈ کے ایک کالج میں پیر کے روز فائرنگ کی ایک واردات کے بعد وہاں کے طلبا اور ملازمین کو کیمپس سے باہر نکالا گیا۔ اس واردات میں دو کالج ملازم معمولی طور پر زخمی ہوئے ہیں۔ تاہم پولیس کا کہنا ہے کہ وہ گولی سے زخمی نہیں ہوئے ہیں۔
پولیس نے بتایا کہ ویسٹ سسیکس کے کرولی کالج میں ہونے والی واردات کے بعد انہوں نے ایک 18 سالہ نوجوان کو گرفتار کیا اور اس سے اسلحہ اور ایک چاقو برآمد کیا ہے۔
ویسٹ سسیکس جنوبی لندن سے 32 میل (51 کلومیٹر) فاصلے پر واقع ہے۔ ملزم فی الحال پولیس کی تحویل میں ہے۔
چیف سپرنٹنڈنٹ ہاورڈ ہوجز نے کہا کہ عہدیداران انسداد دہشت گردی پولیس سے رابطے میں ہیں اور اس معاملے میں ہر پہلو سے تحقیقات کی جارہی ہیں۔ کالج حکام کی جانب سے فائرنگ کی اطلاع ملنے پر پولیس کو موقع پر بھیج دیا گیا تھا۔
کالج نے ٹویٹ کیا کہ وہ پولیس سے مزید معلومات کے منتظر ہے لیکن اس واقعے میں کسی شدید جانی نقصان کی کوئی اطلاع نہیں ہے۔ کالج کے قریب پولیس اہلکاروں کی ایک بڑی تعداد موجود ہے اور لوگوں سے اپیل کی گئی ہے کہ وہ وہاں نہ جائیں۔
