چینی میڈیا کے مطابق وزارت صحت ویتنام نے اعلان کیا ہے کہ اس نے چین کی سائنوفارم ویکسین کے ہنگامی استعمال کی منظوری دے دی ہے، یہ ویتنام میں منظور شدہ تیسری کرونا ویکسین ہے۔ اس طرح ویتنام میں اب تک مجموعی طور پر تین ویکسینز کو منظور کیا جا چکا ہے۔
ویکسین کی منظوری کے لیے ویتنام کے نائب وزیر صحت ٹرونگ چھوک کونگ نے دستخط کیے، اس سے قبل ویتنام میں آسٹرا زینکا اور روسی ویکسین اسپوتنک وی کی منظوری بھی دی جا چکی ہے۔
ویتنام میں اب تک مجموعی طور پر تین ویکسینز منظور کی جا چکی ہیں۔
یاد رہے کہ گزشتہ ہفتے ویتنام میں کووِڈ۔ 19 کی نئی ہائبرڈ قسم کی موجودگی کا انکشاف ہوا تھا، یہ نئی ہائبرڈ قسم برطانوی اور بھارتی اقسام کی خصوصیات کی بھی حامل ہے، جس کی وجہ سے یہ انتہائی متعدی ہے۔
ویت نام کے وزیر صحت نگوین تھان لونگ نے ہفتے کو بتایا تھا کہ اس وائرس میں برطانوی اور بھارتی اقسام کے خواص موجود ہیں، اس وائرس کی یہ ہائبرڈ قسم ہوا میں بہت تیزی سے پھیل سکتی ہے، متعلقہ وزارت کی جانب سے ورلڈ جِین میپ پر اس نئی قسم کا اعلان کر دیا جائے گا۔
انہوں نے کہا کہ کورونا وائرس کے نئے مریضوں میں جن سیکوئسنگ کے دوران اس ہائبرڈ قسم کا انکشاف ہوا، یہ دراصل بھارتی قسم ہے جس میں تبدیلیاں ہوئی ہیں اور اس کی اصلی قسم برطانوی تھی۔
(یو این آئی)
