ترکی چین سے ایک کروڑ کورونا ویکسین خریدے گا

دنیا بھر میں کورونا ویکسین پر ٹرائل جاری ہے اور تقریبا آخری مراحل میں ہیں۔ اب دنیا کے ممالک اپنے شہریوں کو ویکسین مہیا کرانے کے لیے کورونا ویکسین کو خریدنے کی کوشش کر رہے ہیں۔ اسی ضمن میں ترکی نے بھی چینی ویکسین کو خریدنے کی بات کہی ہے۔

عالمی وبائی مرض کورونا وائرس کا سامنا کررہےترکی نے چین کی سنوویک کمپنی سے ایک کروڑ سے زیادہ کورونا ویکسین خریدنے کا فیصلہ کیا ہے اور ویکسین کی خریداری سے متعلق ترکی اس کمپنی سے ایک معاہدہ بھی کرے گا۔

ترکی کے وزیرصحت نے جمعرات کویہ اطلاع دی۔ انہوں نے کہا کہ 'ہم دسمبر میں چین کی کمپنی سے کورونا ویکسین کی کم از کم ایک کروڑ خوراک خریدیں گے اوراس کے لیے ایک یا دو دن میں کمپنی کے ساتھ معاہدے پر دستخط بھی کریں گے'۔

ٹی آر ٹی اسٹیٹ براڈکاسٹنگ کے مطابق وزیرصحت نے کہا کہ ترکی کورونا ویکسین کے ٹیکے کا دعویٰ کرنے والی فائزر کمپنی سے معاہدہ کرنے کے لیے بات چیت کررہا ہے اور اس کمپنی سے کورونا کی ڈھائی کروڑ سے زیادہ ویکسین خریدی جاسکتی ہے۔ ترکی میں کورونا کی 16 ویکسین پر کام کیا جارہا ہے۔

اس سے قبل ستمبر میں چین کی سنوویک کمپنی نے اعلان کرتے ہوئے کہا تھا کہ ترکی، برازیل اور انڈونیشیا نے بھی کورونا ویکسین خریدنے کی منشا ظاہر کی تھی۔

سنوویک کمپنی نے کہا ہے کہ کورونا ویکسین کاٹیکہ جنوری تک پوری طرح تیار ہوجائے گا۔ اس ویکسین کے پہلے اور دوسرے مرحلہ کا تجربہ اپریل میں کیا گیا تھا جبکہ تیسرے مرحلے کا تجربہ جاری ہے۔