پاکستان میں ٹیکہ کاری کی رفتار نہایت سست

اس کی اہم وجہ پاکستان کے عوام میں ٹیکے کے متعلق پھیلی ہوئی غلط فہمیاں بتائی جا رہی ہیں۔

عالمی وبا کورونا سے تحفظ کے لئے ایک طرف جہاں پوری دنیا میں ٹیکہ کاری مہم زور شور سے چلائی جا رہی ہے اور ٹیکہ کاری مہم میں حصہ لینے کے لئے عوام کو راغب کرنے کے لئے مختلف چیزوں کا لالچ دیا جارہا ہے وہیں پاکستان میں ٹیکہ کاری کی مہم بہت سست ہے جن کی وجوہات میں ٹیکہ کے متعلق غلط فہمیاں بھی ہیں۔

پاکستان کی کل آبادی کا تقریباً 5 فیصد اور کورونا ویکسین کے لیے اہل آبادی (18 سال سے زائد عمر کے افراد) کے 10 فیصد لوگوں کو کووڈ 19 ویکسین کی کم از کم ایک خوراک مل چکی ہے، اس کے باوجود ملک اب بھی ان ممالک میں شامل ہے جہاں ویکسینیشن کی رفتار بہت سست ہے۔ اس سلسلے میں ماہرین کا خیال ہے کہ ویکسی نیشن کی سست رفتار کے پیچھے آگاہی کی کمی، غلط فہمیاں، ویکسین میں ہچکچاہٹ اور پروپیگنڈا ہیں۔

ڈان کی رپورٹ کے مطابق اعداد و شمار سے پتہ چلتا ہے کہ اسلام آباد میں اہل افراد کے 35 فیصد لوگ ویکسین لگواچکے ہیں تاہم بلوچستان میں صرف 3 فیصد لوگوں نے ویکسین لگوایا جبکہ سندھ اور پنجاب میں تقریباً 10 فیصد لوگوں کو کم از کم ایک خوراک لگادی گئی ہے۔

وزارت قومی صحت سروسز (این ایچ ایس) نے دعوٰی کیا ہے کہ ویکسین لگوانا کوئی بڑا مسئلہ نہیں ہے تاہم زیادہ تر چاہتے ہیں کہ ویکسین سینٹرز ان کی رہائش گاہوں کے قریب ہوں اور انہیں طویل قطاروں میں انتظار نہ کرنا پڑے۔ جہاں عالمی آبادی کا 25 فیصد ویکسین لگوا چکا ہے وہیں بھارت اور ملائشیا میں 20 فیصد، ترکی میں 40 فیصد، امریکہ میں 50 فیصد سے زائد اور اسرائیل اور برطانیہ میں 65 فیصد کو کم از کم ایک خوراک لگائی جاچکی ہے۔

دستیاب دستاویزات کے مطابق پاکستان میں 12 کروڑ 50 لاکھ سے زائد افراد (18 سال سے زائد عمر کے) ویکسینیشن کے لیے اہل ہیں۔ پنجاب میں 6 کروڑ 60 لاکھ، افراد، سندھ میں 2 کروڑ 80 لاکھ، خیبرپختونخوا میں ایک کروڑ 90 لاکھ، بلوچستان میں 64 لاکھ، آزاد جموں و کشمیر میں 27 لاکھ، اسلام آباد میں 14 لاکھ اور گلگت بلتستان میں 11 لاکھ افراد کورونا ویکسینیشن کے لیے اہل ہیں۔

اب تک ایک کروڑ 20 لاکھ افراد نے ویکسینیشن کے لیے اندراج کرایا ہے جن میں سے پنجاب میں 40 لاکھ لاکھ، سندھ میں 40 لاکھ، خیبر پختونخواہ میں 30 لاکھ، اسلام آباد میں 7 لاکھ، آزاد جموں و کشمیر میں 7 لاکھ، بلوچستان میں 3 لاکھ 2 ہزار اور گلگت بلتستان میں 2 لاکھ 70 ہزار افراد نے ویکسین کے لیے اندراج کرایا ہے۔

اعداد و شمار سے پتہ چلتا ہے کہ 48 فیصد افراد نے اسلام آباد میں، آزاد جموں و کشمیر اور گلگت بلتستان 24 فیصد، پنجاب میں 18 فیصد، خیبر پختونخوا میں 15 فیصد، سندھ میں 14 فیصد اور صرف بلوچستان میں صرف 5 فیصد نے اندراج کرایا ہے۔اب تک پنجاب 20 لاکھ سے زائد افراد، سندھ میں 10 لاکھ، خیبر پختونخوا میں 4 لاکھ 60 ہزار، اسلام آباد میں 2 لاکھ، آزاد جموں و کشمیر میں ڈیڑھ لاکھ اور بلوچستان اور گلگت بلتستان میں 60، 60 ہزار کو مکمل طور پر ویکسین لگائی جاچکی ہے۔

(یو این آئی)