نیپال میں سیاسی بحران جاری ہے۔ وزیر اعظم کے پی شرما اولی اور حزب اختلاف کی جماعتوں کی نئی حکومت تشکیل دینے کی کوششوں کے درمیان نیپال کی صدر ودیا دیوی بھنڈاری نے ایوان نمائندگان کو تحلیل کردیا اور وسط مدتی انتخابات کے لئے نئی تاریخوں کا اعلان کر دیا ہے۔
صدر کے دفتر کے مطابق وسط مدتی انتخابات نیپال میں 12 اور 19 نومبر کو ہوں گے۔
صدر دفتر نے کہا کہ صدر نے وزیر اعظم کے عہدے کے لئے شیر بہادر دیوبا اور کے پی شرما اولی دونوں کے دعوؤں کو مسترد کردیا ہے۔
اس سے قبل جمعہ کے روز دونوں وزیر اعظم کے پی شرما اولی اور اپوزیشن جماعتوں نے اراکین پارلیمنٹ کے دستخط کے ساتھ ایک خط صدر ودیا دیوی بھنڈاری کو پیش کیا تھا، جس میں نئی حکومت تشکیل دینے کا دعویٰ کیا تھا۔
وزیر اعظم اولی نے آئین کے آرٹیکل 76 (5) کے مطابق دوبارہ وزیر اعظم بننے کے لئے اپنی پارٹی سی پی این-یو ایم ایل کے 121 ممبران اور جنتا سماج وادی پارٹی نیپال (جے ایس پی-این) کے 32 ممبران کی حمایت کے دعوے کا ایک خط پیش کیا تھا۔
جبکہ نیپالی کانگریس کے صدر شیر بہادر دیوبا نے 149 ممبران پارلیمنٹ کی حمایت حاصل کرنے کا دعویٰ کیا تھا۔
دیوبا وزیر اعظم کے عہدے کے دعوے کے لئے حزب اختلاف کی جماعتوں کے رہنماؤں کے ساتھ صدر کے دفتر پہنچے تھے۔
صدر ودیا دیوی بھنڈاری نے اپوزیشن اتحاد سے کہا تھا کہ وہ حکومت تشکیل دینے کے معاملے پر آئینی ماہرین سے مشورہ کرنے کے بعد ہی کوئی فیصلہ لیں گی۔
