پاکستان کی قومی ایئر لائن پی آئی اے کے ایک مسافر طیارے کو ملیشیا کے دارالحکومت کوالالمپور میں روک لیا گیا ہے۔
پی آئی اے کے ترجمان کے مطابق ’ملیشیا کی ایک مقامی عدالت نے یکطرفہ فیصلے کے تحت پی آئی اے کے ایک طیارے کو روک لیا ہے جس کا قانونی معاملہ قومی ایئر لائن اور ایک فریق کے مابین برطانوی عدالت میں زیر التوا ہے۔‘
ترجمان کی جانب سے جاری بیان میں کہا گیا ہے کہ پی آئی اے مسافروں کی دیکھ بھال کر رہی ہے اور ان کے لیے متبادل پرواز کا بندوبست کیا جا رہا ہے۔
یہ بھی پڑھیں: شمالی کوریا: فوجی پریڈ میں بیلسٹک میزائل کی نمائش
بیان کے مطابق یہ ناقابلِ قبول صورتحال ہے جس میں پی آئی اے حکومت کے تعاون سے معاملے کو سفارتی چینلز استعمال کرتے ہوئے متعلقہ فورم پر اٹھایا جا رہا ہے۔
مقامی میڈیا کے مطابق پی آئی اے کی پرواز پی کے 9895 کراچی سے آج کوالالمپور پہنچی تھی۔ پی آئی اے نے سنہ 2015 میں بوئنگ 777 طیارہ ویتنام کی کمپنی سے لیز پر حاصل کیا تھا۔ گذشتہ چند ماہ سے اس کے واجبات کی ادائیگی کے حوالے سے تنازع چل رہا تھا اور کمپنی معاملہ عدالت لے گئی تھی۔
وہیں، پاکستانی وزارت خارجہ کے ترجمان زاہد حفیظ کا کہنا ہے کہ ملیشیا میں پی آئی اے کا طیارہ تحویل میں لیے جانے کے معاملے کو جلد حل کرنے کی کوشش کر رہے ہیں۔
تفصیلات کے مطابق، وزارت خارجہ نے ملیشیا میں پی آئی اے کا طیارہ تحویل میں لیے جانے کے معاملے پر اپنے بیان میں کہا ہے کہ ملیشیا میں پاکستانی ہائی کمیشن، متعلقہ حکام اور پی آئی اے سے رابطے میں ہیں، معاملے کو جلد حل کرنے کی کوشش کر رہے ہیں۔
ترجمان دفتر خارجہ زاہد حفیظ کا کہنا ہے کہ مسافروں کا مکمل خیال رکھا جا رہا ہے۔ مسافروں کو متبادل ذرائع سے بھیجنے کے لیے انتظامات مکمل کر لیے گئے ہیں۔ مسافر آج رات کوالالمپور سے پرواز ای کے 343 سے روانہ ہوں گے۔
خیال رہے کہ پاکستان کی قومی ایئر لائن پی آئی اے گذشتہ ایک برس سے مشکلات کا شکار ہے۔ پائلٹس کے لائسنسز پر شکوک و شبہات سامنے آنے کے بعد یورپ میں پی آئی اے پر پابندی عائد کی جا چکی ہے۔
