پاکستان کے زیرانتظام کشمیر میں بالا کوٹ کے مقام پر بھارتی فضائی کے حملے میں 200 سے 300 کے درمیان شدت پسندوں کے مارے جانے کی اطلاع ہے۔
بھارتی فضائیہ کے مطابق بھارتی لڑاکا طیاروں نے تقریبا ساڑھے تین بجے سرحد پار جا کر شدت پسندوں کے ٹھکانے مکمل طور پر تباہ کیے۔
بتایا جا رہا ہے کہ شدت پسندوں کے ٹھکانے پر 1000 کلو گرام بم گرائے گئے ہیں۔ اس حملے میں پاکستان کے زیرانتظام کشمیر کے علاقے، بالا کوٹ، مظفر آباد اور چرکوٹ میں قائم شدت پسند تنظیم جیش محمد کے ٹھکانے کو مکمل طور پر تباہ کر دیا گیا ہے۔
تاہم مرکزی حکومت کو اس آپریشن کے حوالے سے فوج کی جانب سے تفصیلی رپورٹ کا انتظار ہے۔
اس معاملے میں قومی سلامتی کے مشیر اجیت ڈوبھال اور وزیر دفاع نرملا سیتا رمن وزیراعظم مودی کو بریفنگ دیں گے۔
اس آپریشن میں شدت پسندوں کے لانچنگ پیڈ کو مکمل طور پر تباہ کر دیا گیا ہے۔
پاکستانی فوج کے ترجمان نے بھارتی فضائیہ پر لائن آف کنٹرول کی خلاف ورزی کر کے پاکستانی سرحد میں دراندازی کرنے کا الزام عائد کیا ہے۔
پاکستان فوج کے ترجمان میجر جنرل آصف غفور نے الزام عائد کیا کہ بھارتی فضائیہ نے مظفر آباد سیکٹر میں لائن آف کنٹرول کی خلاف ورزی کی۔
آصف غفور نے اپنے ٹویٹر صحفہ پر لکھا کہ: 'انڈین ایئر فورس کے طیارے لائن آف کنٹرول پر جنگ بندی کی خلاف ورزی کرتے ہو ئے پاکستانی حدود میں داخل ہو گئے، تاہم پاکستان ایئر فورس کے فوری طور پر حرکت میں آنے سے بھارتی جنگی طیاروں کو واپس لوٹنا پڑا'۔
انہوں نے مزید کہا کہ واپسی میں بھارتی فضائیہ کے جگی طیارے نے بالاکوٹ کے پاس کچھ گرایا ہےلیکن کچھ نقصان نہیں ہوا ہے'۔
