چین نے جمعہ کے روز کہا کہ وہ کووڈ 19 وبا کے خلاف جنگ میں بھارتی حکومت اور اس کے لوگوں کے ساتھ کھڑا ہے اور وبائی امراض سے نمٹنے میں مدد فراہم کرنے کے لئے نئی دہلی سے رابطے میں ہے۔
چین نے جمعرات کو اس وبا کی دوسری لہر سے نمٹنے کے لئے بھارت کو ضروری مدد کی پیش کش کی تھی۔
چینی وزارت خارجہ کے ترجمان ژاؤ لیجن نے یہاں میڈیا سے گفتگو کرتے ہوئے کہا کہ 'ہم بھارت میں وبا کی بگڑتی ہوئی صورتحال پر ہمدردی کا اظہار کرتے ہیں۔'
سرکاری چینی میڈیا کے ایک سوال کے جواب میں انہوں نے کہا کہ 'چینی حکومت اور چینی عوام بھارتی حکومت اور بھارتی عوام کے ساتھ مضبوطی سے کھڑے ہیں۔'
لیجن نے کہا کہ ''بھارت کی ضرورت کے مطابق ہم امداد کے لئے تیار ہیں۔ ابھی ہم بھارت کے ساتھ بات کر رہے ہیں۔''
انہوں نے کہا کہ 'ہمیں یقین ہے کہ بھارتی عوام جلد ہی اس وبا پر قابو پالیں گے۔'
کورونا وائرس کے انفیکشن کا پہلا کیس 2019 کے آخر میں چین کے ووہان شہر میں سامنے آیا تھا اور پھر یہ وبا پوری دنیا میں پھیل گئی تھی۔
