امریکہ مالدیپ میں سفارتخانہ کھولے گا

مالدیپ میں سفارتخانہ کھولنے کے اس فیصلے کو امریکہ کی ہند بحرالکاہل کی حکمت عملی کا ایک اہم پہلو مانا جا رہا ہے۔

امریکہ نے مالدیپ میں سفارتخانہ کھولنے کا تاریخی فیصلہ کا اعلان کیا ہے۔

امریکی وزیر خارجہ مائک پومپیو نے بدھ کے روز بحر ہند میں واقع جزیرے کے دورے کے وقت یہ اعلان کیا۔

پومپیو نے ٹویٹ کیا ہے کہ 'مجھے یہ اعلان کرتے ہوئے بے حد خوشی ہو رہی ہے کہ امریکہ مالدیپ میں سفارتخانہ کھولے گا جہاں مستقل طور پر امریکی سفیر کی تقرری ہوگی'۔

بہ شکریہ ٹوئٹر

انھوں نے کہا ہے کہ 'اس سے امریکہ۔مالدیپ کے مستحکم ہوتے تعلقات اور بحر ہند کے علاقے سے متعلق امریکی عزم کا پتہ چلتا ہے'۔

مالدیپ میں سفارتخانہ کھولنے کے اس فیصلے کو امریکہ کی ہند بحرالکاہل کی حکمت عملی کا ایک اہم پہلو مانا جا رہا ہے۔

دونوں ملکوں کے مابین 1966 سے ہی سفارتی تعلقات ہیں۔ امریکہ اور مالدیپ کے درمیان بحری سلامتی سمیت کئی دیگر علاقوں میں تعلقات مسلسل مستحکم ہو رہے ہیں۔

امریکی وزیر خارجہ نے مالدیپ میں سفارتخانہ کھولنے کے فیصلے کو دونوں ملکوں کے باہمی تعلقات میں ایک سنگ میل قرار دیتے ہوئے مخلتف شعبوں میں باہمی تعاون کو مزید مستحکم کرنے کا عزم ظاہر کیا ہے۔