ایک روز قبل ہی امریکہ میں نئی حکومت کی باگ ڈور سنبھالنے والے صدر جو بائیڈن نے مختلف اعلانات کے ساتھ ہی کئی حکم ناموں پر دستخط بھی کردیئے ہیں۔ امریکی صدر جو بائیڈن نے امریکہ آنے والے مسافروں کے تعلق سے کہا ہے کہ انہیں قرنطینہ میں رہنا ہوگا، ان کا ماننا ہے کہ پہلے 100 دن کے چیلنجوں میں سے ایک چیلنج یہ بھی ہے کہ تمام امریکی ماسک لگائیں۔ ماہرین کے مطابق لوگوں نے ماسک پہنا تو اپریل تک 50 ہزار سے زیادہ جانیں بچائی جاسکتی ہیں۔
انہوں نے کہا کہ ماضی کی حکومت کورونا پر فوری توجہ دینے اور عوام میں ہم آہنگی پیدا کرنے میں ناکام رہی، ماضی کی حکومت کی ناکامی کی قیمت روزانہ 3 سے 4 ہزار اموات کی شکل میں چکانی پڑ رہی ہے۔
اس ضمن میں صدر بائیڈن کا مزید کہنا تھا کہ کورونا وائرس پر قابو پانے میں کچھ مہینے لگ سکتے ہیں، کورونا وائرس سے متعلق حکومت کا جو بھی پلان ہے اسے تمام امریکیوں کو مل کر کامیاب بنانا ہے۔
