کورونا وائرس کے حوالہ سے امریکہ اور چین کے درمیان بڑھتی ہوئی تلخیوں کے درمیان امریکہ نے امید ظاہر کی ہے کہ چین اپنے یہاں سے امریکی صحافیوں کو نکالے جانے کے فیصلے پر دوبارہ غور کرے گا۔
امریکی وزیر خارجہ مائیک پومپيو نے نامہ نگاروں کو بتایا’’یہ بدقسمتی کی بات ہے۔ ہمیں ابھی پتہ چلا۔ مجھے امید ہے کہ وہ نظر ثانی کریں گے‘‘۔
اس سے قبل چین کی وزارت خارجہ نے منگل کو امریکی صحافیوں پر پابندی لگانے کا فیصلہ کیا اور امریکہ کے ’نيويارك ٹائمز‘، ’وال اسٹریٹ جرنل‘ اور ’واشنگٹن پوسٹ‘ جیسے مستند اخبارات کے صحافیوں سے ان کا پریس کارڈ لوٹانے کو کہا تھا۔
قابل ذکر ہے کہ امریکہ نے کچھ دنوں پہلے چین کی سرکاری میڈیا کے لئے بہت سخت قانون بنائے ہیں۔ چین نے بھی جوابی کارروائی میں اس طرح کا قدم اٹھایا اور امریکی میڈیا اداروں-’ وائس آف امریکہ‘، ’دی نیو یارک ٹائمز‘، ’دی وال اسٹریٹ جرنل‘، ’دی واشنگٹن پوسٹ‘ اور ’ٹائم میگزین‘ سے کہا کہ وہ چین میں اپنے ملازمین اور املاک و اثاثہ سمیت پورے کام کاج کی تفصیلی معلومات دیں۔
