مائیکروسافٹ کے شریک بانی اور چیئرمین بل گیٹس نے عالمی وبا کورونا وائرس کے مسلسل بڑھتے کیسز کے درمیان امریکہ کی جانب سے عالمی ادارہ صحت کی فنڈنگ روکنے کے فیصلہ کو خطرناک قرار دیا ہے۔
مسٹر گیٹس نے بدھ کو ٹوئٹ کرکے کہا کہ اس عالمی صحت کے بحران کے دوران ڈبلیو ایچ او کی فنڈنگ روکنا خطرناک ہے۔
مائیکروسافٹ کے چیئرمین نے کہا کہ ڈبلیو ایچ او کی جانب سے کئے جا رہے کاموں سے کووڈ -19 کے انفیکشن کو پھیلنے سے روکنے میں مدد ملی ہے اگر ڈبلیو ایچ او کا کام رک جاتا ہے تو کوئی دوسری تنظیم اس کی جگہ نہیں لے سکتی۔
انہوں نے کہا کہ موجودہ وقت میں دنیا کو ڈبلیو ایچ او کی پہلے سے کہیں زیادہ ضرورت ہے۔
اس سے قبل امریکی صدر ڈونالڈ ٹرمپ نے عالمی ادارہ صحت کو دئیے جانے والے فنڈ کو روکنے کی ہدایت دی تھی، مسٹر ٹرمپ نے ڈبلیو ایچ او پر کوروناوائرس کے انفیکشن کو پھیلنے سے روکنے میں ناکام رہنے اور اس سے متعلق صحیح معلومات چھپانے کا الزام لگایا ہے۔
انہوں نے منگل کو وائٹ ہاوس میں باقاعدہ پریس بریفنگ کے دوران کہا کہ 'آج میں اپنی انتظامیہ کو ڈبلیو ایچ او کی فنڈنگ روکنے کی ہدایت دے رہا ہوں۔کووڈ -19 کے حوالے سے بدنظمی اور اس کے بڑھتے ہوئے کیسز کو چھپانے میں ڈبلیو ایچ او کے کردار کا جائزہ لیا جائے گا'۔
قابل غور ہے کہ امریکہ ڈبلیو ایچ او کوسالانہ 40 سے 50 کروڑ ڈالر کی مالی امداد فراہم کرتا ہے۔
