نائیجیریا: بس ندی میں گری، درجن سے زائد افراد ہلاک

صوبے کے پولیس ترجمان لووتھ اوڈاہ نے بتایا کہ برآمد ہونے والی لاشوں میں سات مرد اور سات خواتین شامل ہیں۔

افریقی ملک نائیجیریا کے صوبے ایبونی کے ضلع ایوو میں ایک مسافر بردار بس کے ندی میں گرنے سے 14 افراد کی موت ہوگئی ۔

فیڈرل روڈ سیفٹی کور کے صوبائی کمانڈر اسٹیلا اوچیگبو نے اطلاع دی کہ یہ حادثہ جمعہ کی شام کو اس وقت پیش آیا جب بس چرچ کے اراکین کے ساتھ واپس جارہی تھی۔

انہوں نے بتایا کہ بس میں سوار افراد کی تعداد معلوم نہیں ہوسکی ہے اور ان کی شناخت نہیں ہوسکی ہے۔

اسٹیلا اوچیگبو نے بتایا کہ اب تک 14 لاشیں برآمد ہوچکی ہیں۔

انہوں نے بتایا کہ 'بس ڈرائیور نے اوورٹیک کرنے کی کوشش کے دوران گاڑی کا کنٹرول کھو دیا جس سے بس ندی میں گر گئی'۔

صوبے کے پولیس ترجمان لووتھ اوڈاہ نے بتایا کہ برآمد ہونے والی لاشوں میں سات مرد اور سات خواتین شامل ہیں۔

اوڈاہ کے مطابق پانچ افراد کو مقامی حکام نے بچایا ہے اور متعدد دیگر لاپتہ بتائے جارہے ہیں۔

انہوں نے بتایا کہ 'بچائے گئے لوگوں میں سے کچھ بے ہوش ہوگئے تھے جنہیں اسپتال منتقل کردیا گیا ہے'۔

حفاظتی عملہ زخمیوں اور لاشوں کی تلاش کررہے ہیں۔