جسٹس اے ایم کھانولکر اور جسٹس ریشی کیش رائے کی بینچ نے ہفتے کی چھٹی کے باوجود آج خصوصی سماعت کرتے ہوئے ووٹوں کی گنتی کی اجازت دی ہے۔
عدالت نے ووٹوں کی گنتی کرانے کا حکم اترپردیش ریاستی الیکشن کمیشن کی جانب سے کرائی گئی اس یقین دہانی کے بعد دیا جس میں کہا گیا ہے کہ کمیشن کورونا کی وبا سے متعلق پروٹوکول پر عمل کرتے ہوئے ووٹوں کی گنتی کرائےگا۔
کمیشن کی جانب سے پیش ایڈیشنل سالیسیٹر جنرل اور سینیئر وکیل ایشوریا بھاٹی کی دلیلیں سننے کے بعد بینچ نے کہا کہ ’’ہم کورونا سے متعلق سبھی ہدایات پر ہر حال میں عمل کرنے کی کمیشن کی یقین دہانی کے بعد ووٹوں کی گنتی ٹالنے کی اپیل خارج کرتے ہیں۔‘‘
واضح رہے کہ الہ آباد ہائی کورٹ نے گزشتہ سات اپریل کو مقامی بلدیاتی انتخابات پر روک لگانے سے انکار کردیا تھا جس کے خلاف سپریم کورٹ میں خصوصی اجازت عرضیاں دائر کی گئی تھیں۔
عرضی گزاروں کی جانب سے وکیل شعیب عالم نے کہا کہ یہ پولنگ بوتھ کورونا انفیکشن کے پھیلاؤ کی وجہ نہ بن جائیں۔
