پنجاب کی کپورتھلہ پولیس نے ریاست کی جیلوں میں بند بدنام زمانہ گینگسٹر کی جانب سے چلائے جارہے ایک بڑے گروہ کا پردہ فاش کرتے ہوئے دو منشیات اسمگلروں کو گرفتار کیا ہے اور 20 کلو ہیروئن برآمد کی ہے۔
ڈائریکٹر جنرل پولیس دنکر گپتا نے بتایا کہ اسمگلروں کی شناخت بلوندر سنگھ (ہوشیار پور) اور پیٹر مسیح (جالندھر) کے طور پر ہوئی ہے۔ دونوں اسمگلر پہلے ہی مجرمانہ مقدمات کا سامنا کر رہے ہیں۔
انہوں نے بتایا کہ پولیس ٹیموں نے منگل کو کپورتھلہ کے ہائی ٹیک ناکہ ڈھلوان میں ایک ٹرک اور ایک ہنڈائی کار کی تلاشی لی اور ان کے قبضے سے 20 کلو ہیروئن کی کھیپ برآمد کی۔ پولیس پارٹی نے گاڑیوں کو چیک پوائنٹ پر رکنے کا اشارہ کیا لیکن انہوں نے گاڑی چھوڑ کر بھاگنے کی کوشش کی۔ مختصر تعاقب کے بعد محتاط پولیس نے انہیں جائے واقع پر ہی پکڑ لیا۔
مزید پڑھیں:منشیات معاملہ: پوری جگناتھ ای ڈی کے روبرو حاضر
گپتا نے بتایا کہ ان کے قبضے سے اور ان کی گاڑیوں کی چیکنگ کے دوران ہیروئن کے بیس پیکٹ برآمد ہوئے۔
ڈسٹرکٹ سینئر سپرنٹنڈنٹ آف پولیس ایچ ایس کھکھ نے بتایا کہ ٹرک ڈرائیور کے کیبن کی چھت میں منشیات کے اسمگلروں نے سامان کو چھپانے کے لیے دو خصوصی بکس بنائے تھے۔
پولیس گرفتار ملزمین کو مجسٹریٹ کے سامنے پیش کرے گی اور مزید تفتیش کے لیے ان کا پولیس ریمانڈ طلب کرے گی تاکہ اس منشیات کے سنڈیکیٹ میں شامل تمام روابط کا پتہ چل سکے۔
واضح رہے کہ پولیس گزشتہ 12 دنوں میں بین الاقوامی مارکیٹ میں 400 کروڑ روپے مالیت کی 78 کلو سے زائد ہیروئن ضبط کرنے میں کامیاب ہوئی ہے۔
یو این آئی
