ریاست آندھراپردیش کے وزیراعلی وائی ایس جگن موہن ریڈی نے جمعہ کو ویڈیو لنکیج کے ذریعہ تاڑے پلی میں واقع اپنے کیمپ آفس سے وائی ایس آر ویدادری لفٹ اریگیشن اسکیم کی تعمیر کے لئے سنگ بنیاد رکھا۔
اس موقع پر انہوں نے نشاندہی کی کہ ضلع کرشنا کے نندی گاما،وتساوائی،پینوگنچی پیرلو اور جگیاپیٹ منڈلوں میں پینے کے پانی کی قلت پائی جاتی ہے۔حکومت لفٹ اریگیشن اسکیم تعمیر کررہی ہے تاکہ اس علاقہ میں پینے کے پانی اور آبپاشی کے لئے پانی فراہم کیا جاسکے۔
انہوں نے کہا کہ حکومت کا مقصد لفٹ اسکیم کے ذریعہ ان علاقوں میں 2.7ٹی ایم سی پانی فراہم کرنا ہے، انہوں نے کہا ”ہمارا مقصد فروری 2021تک لفٹ اریگیشن اسکیم کی تعمیر مکمل کرناہے، اس پروجیکٹ کی شروعات کی گئی ہے کیونکہ ناگرجناساگر لفٹ کنال کا پانی اس علاقہ کو نہیں پہنچ رہا ہے۔ اس لفٹ اریگیشن اسکیم کے ذریعہ 38,627ایکڑ اراضی کو پانی فراہم کیاجائے گا۔
انہوں نے کہا کہ جگیا پیٹ بلدی حدود کے علاقوں کے علاوہ ڈی بی آر برانچ کنال کے حدود والے30 مواضعات کو بھی پانی سپلائی کیا جائے گا۔
