جمعیۃ یوتھ کلب بنارس کی کلر پارٹی نے دونوں مہمانوں کا روایتی انداز میں استقبال کیا۔ پروگرام کا آغاز بھارت اسکاؤٹ اینڈ گائیڈ اور جمعیۃ علماء ہند کی اے ڈی ایم سٹی اور حاجی ابوالہاشم (صدر جمعیۃ علماء بنارس) کے ہاتھوں پرچم کشائی سے ہوا۔
جمعیت یوتھ کلب بنارس کے کنوینر محمد رضوان نے جمعیت یوتھ کلب کا تعارف کرایا اور آج کے پروگرام کے اغراض و مقاصد پر تفصیل سے روشنی ڈالی۔ انہوں نے اس بات کہ اعلان کیا کہ جمعیت یوتھ کلب بنارس نے بیلوڑی گاؤں کو گود لینے کا فیصلہ کیا ہے اور یہ طے ہوا ہے کہ تعلیم، صفائی، صحت اور مختلف شعبوں میں عوامی بیداری کے پروگرام منعقد کرکے ضلع انتظامیہ اور عوامی نمائندوں کے تعاون سے اس گاؤں کو ایک مثالی گاؤں بنانا ہے۔
مہمان خصوصی اے ڈی ایم سٹی نے اپنے تفصیلی خطاب میں ماحولیات کے تحفظ اور اس کی اہمیت پر تفصیل سے روشنی ڈالی اور جمعیت یوتھ کلب بنارس کی اس پہل کی کافی تعریف کی اور اس کو سراہا۔ پردھان سمت کمار نے نوجوانوں کے اس پروگرام کی تعریف کی اور اس بات کا یقین دلایا کہ گاؤں میں کام کرنے کے دوران وہ ہر طرح کا تعاون کرنے کو تیار ہیں۔ آخر میں جمعیت علماء مشرقی اترپردیش کے جنرل سکریٹری حافظ عبیداللہ نے آئے ہوئے تمام مہمانوں کا خاص طور پر اے ڈی ایم سٹی کا شکریہ ادا کرتے ہوئے کہا کہ ہماری ایک درخواست پر ہمارے اس پروگرام میں تشریف لائے جمعت علماء نے یہ فیصلہ کیا ہے کہ ہم سب کو آپس کے تعاون سے اس گاؤں کو ایک مثالی گاؤں بنانا ہے اور اس کے لیے جو بھی ضرورت پڑےگی انشاء اللہ جمعیۃ علماء ہر طرح کے تعاون کے لیے تیار ہے۔
جمعیت علماء بنارس کے جنرل سکریٹری مولانا احمد شکیل کی دعا پر اس نشست کا اختتام ہوا جس کے بعد آئے ہوئے مہمانوں اور جمعیت علماء کے عہدیداران اور جمعیت یوتھ کلب کے نوجوانوں کے ذریعہ شیخ الہند ٹریننگ سینٹر اور بیلوڑی گاؤں میں بڑے پیمانے پر شجرکاری کی گئی۔ جمعیۃ علماء بنارس کے جنرل سکریٹری مولانا احمد شکیل نے بتایا کہ پودا لگانا صدقۃ جاریہ ہے، لہٰذا ہم اپنے آج کے اس شجر کاری مہم کو حضرت مولانا قاری مرحوم سید محمد عثمان منصورپوری رحمتہ اللہ علیہ کی نذر کرتے ہیں۔
پروگرام کو کامیاب بنانے میں جمعیۃ یوتھ کلب بنارس کے تمام نوجوانوں کے ساتھ ساتھ جامعہ اسلامیہ بیلوڑی کے استاذ حافظ تنویر کا خصوصی تعاون رہا۔
