ماڈرن ٹیچرس کو 52 ماہ سے تنخواہ نہیں ملی

ضلع مئو میں مدرسہ جدیدکاری منصوبے کے تحت تقرر کیے گئے ماڈرن ٹیچرز کو برسوں سے تنخواہ نا ملنے کی وجہ سے بے حد پریشان ہیں، مدرسہ جدیدکاری اسکیم کے تحت 60 فیصد رقم مرکزی حکومت جاری کرتی ہے، جبکہ 40 فیصد ادا کرنے کا ذمہ ریاستی حکومت کا ہوتا ہے.

ریاست اترپردیش کے ضلع مئو میں مدرسہ جدیدکاری منصوبے کے تحت تقرر کیے گئے ماڈرن ٹیچرس بے حد پریشان ہیں، برسوں سے بغیر تنخواہ کے اپنے فرائض انجام دینے والے مدرسہ ماڈرن ٹیچرس معاشی بحران کے شکار ہیں۔

تقریبا 52 ماہ سے ان کی تنخواہ جاری نہیں کی گئی ہے، مدارس میں جدید علوم کی تربیت دینے کی غرض سے ماڈرن ٹیچرز کی تقرری کی گئی ہے۔

آل انڈیا مدرسہ ماڈرن ٹیچرز ایسوسی ایشن کے ذمہ داروں کے مطابق لاک ڈاؤن کے دوران بھی حکومت نے ماڈرن ٹیچرز کے ساتھ منصفانہ سلوک نہیں کیا، ایسوسی ایشن کی مئو شاخ کے ترجمان شمیم انور انصاری نے کہا کہ وزیراعظم نریندر مودی کے پورٹل پر بھی اپنی پریشانی بیان کرنے کے باوجود کوئی حل نہیں نکلا۔ ایسوسی ایشن نے مسئلہ کا جلد حل نہ نکلنے کی صورت میں احتجاج کی راہ اختیار کرنے کا انتباہ کیا ہے۔